लुम्बिनी, असार २१ । लुम्बिनी प्रदेश सरकारको आर्थिक वर्ष २०८०/८१ को बजेट बहुमतले स्वीकृत भएको छ । बुधबार बसेको प्रदेशसभा बैठकले आगामी आर्थिक वर्षको बजेट पारित गरेको हो ।
प्रदेश सभामा अर्थमन्त्री धनबहादुर मास्कीले कार्यकारिणी बजेट प्रस्ताव पारित गर्न विचार गरियोस् भनी विधेयक प्रस्तुत गरेका थिए ।
सभामुख तुलाराम घर्तीले बजेट प्रस्तावलाई ध्वनि मतका आधारमा बहुमतले पारित गरेको घोषणा गरे ।
अर्थमन्त्रीले सरकारको तर्फबाट आर्थिक वर्ष २०८०/८१ का लागि करिब ४० अर्ब ४७ करोड ९० लाख रुपैयाँको बजेट प्रदेशसभामा पेस गरेका थिए ।
प्रमुख प्रतिपक्षी दल नेकपा एमालेले प्रदेश सरकारले ल्याएको बजेटको विरोध गर्दै आएको छ । जसका कारण लगातार चार दिनसम्म प्रदेशसभा अवरुद्ध भएको थियो ।
मंगलबार मुख्यमन्त्री डिल्लीबहादुर चौधरी र प्रमुख प्रतिपक्षी दलका नेताबीचको वार्तापछि प्रदेशसभाको बैठकले कामकाज जारी राखेको थियो ।
लुम्बिनी प्रदेश सरकारले आवर्ती वर्गतर्फ १३ अर्ब ६३ करोड ३३ लाख (३३.६८ प्रतिशत), पुँजीगत वर्गतर्फ २३ अर्ब २५ करोड ६९ लाख र वित्तीय व्यवस्थापनतर्फ ३ अर्ब ५८ करोड (८.८७ प्रतिशत) बजेट ल्याएको छ ।
