काठमाडौं, असार २१ । श्रीलंका भ्रमणमा रहेका नेकपा (एकीकृत समाजवादी)का अध्यक्ष तथा पूर्वप्रधानमन्त्री माधवकुमार नेपालले बुधबार श्रीलंकाका राष्ट्रपति र प्रधानमन्त्रीसँग भेटवार्ता गरेका छन् ।
श्रीलंकाका राष्ट्रपति रनिल विक्रमासिङ्घेको निवासमा भएको भेटवार्तामा दुई देशबीचको सम्बन्धका विविध पक्षमा छलफल भएको नेता नेपालको निजी सचिवालयले जनाएको छ ।
त्यसैगरी अध्यक्ष नेपालले बुधबार साँझ श्रीलंकाका प्रधानमन्त्री दिनेश गुणवर्देनासँग पनि भेटवार्ता गरेका छन् । प्रधानमन्त्री निवासमा भएको भेटवार्तामा दुई देशबीचको मैत्रीपूर्ण सम्बन्ध र एसियाली मुलुकका विकासका विषयमा छलफल भएको थियो ।
श्रीलङ्काको कम्युनिष्ट पार्टीको ८०औँ स्थापना दिवस समारोहमा सहभागी हुन र दक्षिण एसियाका कम्युनिष्ट पार्टीहरूको बैठकमा सहभागी हुन नेपाल सोमबार श्रीलंका प्रस्थान गरेको छ ।
Published Date: 06 July 2023
