काठमाडौं, असार ६ । अन्तर्राष्ट्रिय योग दिवस आज नेपालमा विविध कार्यक्रम गरी मनाइँदैछ । हरेक वर्ष जुन २१ मा विभिन्न जनचेतनामूलक कार्यक्रमको आयोजना गरी अन्तर्राष्ट्रिय योग दिवस मनाइँदै आएको छ ।
सन् २०१४ मा संयुक्त राष्ट्र संघको महासभाको निर्णय अनुसार २१ जुन २०१५ देखि अन्तर्राष्ट्रिय योग दिवस मनाउन थालिएको हो । भारतका प्रधानमन्त्री नरेन्द्र मोदीले संयुक्त राष्ट्रसंघको ६९औँ महासभालाई सम्बोधन गर्दै सबैका लागि योग आवश्यक रहेको तर्क गर्दै जुन २१ लाई अन्तर्राष्ट्रिय योग दिवस घोषणा गर्न आह्वान गर्ने प्रस्ताव राखेका थिए ।
नेपालका तत्कालीन प्रधानमन्त्री सुशील कोइरालाले भारतीय प्रधानमन्त्रीले योग दिवसको घोषणा गरेको आह्वानलाई सर्वप्रथम समर्थन गरेपछि संयुक्त राष्ट्र संघका स्थायी सदस्य राष्ट्र र युरोपेली संघले पनि उक्त प्रस्तावलाई अनुमोदन गरेका थिए ।
अन्तर्राष्ट्रिय योग दिवस स्थापना गर्ने मस्यौदा प्रस्तावलाई १७७ देशले अनुमोदन गरेका छन् । यो घोषणाको ९० दिनमा प्राप्त भएको मस्यौदा प्रस्तावलाई रेकर्ड उच्च समर्थन थियो। सन् २०१६ जुन २१ देखि विश्वभर अन्तर्राष्ट्रिय योग दिवस मनाइँदै आएको छ ।
तत्कालीन शान्ति तथा पुनर्निर्माण मन्त्री नरहरि आचार्यको प्रस्तावमा मन्त्रिपरिषद्ले जनवरी १ लाई राष्ट्रिय योग दिवस घोषणा गरेको थियो । वैदिक कालमा हिमालयको काखमा ऋषिमुनिहरुले सिकाएको योग नेपालमा लोप भयो । यसै क्षेत्रबाट पुनर्जागरण दिवस घोषणा गरी जनचेतनाको काम सुरु गरिएको छ ।
प्राचीन कालमा योग, ध्यान र आयुर्वेदको माध्यमबाट मानसिक शान्ति र स्थिरता र स्वास्थ्य प्राप्त गरिन्थ्यो।