काठमाडौं, असार १ । इटालीलाई पराजित गर्दै स्पेन युइएफए नेसन्स लिग ए च्याम्पियन्ससिपको फाइनलमा प्रवेश गरेको छ । बिहीबार राति भएको सेमिफाइनलमा इटालीमाथि २–१ को जित निकाल्दै स्पेनले फाइनलमा क्रोएसियासँगको भेट पक्का गरेको हो ।
स्पेनको जितमा यारेमी पिनो र जोसेलुले गोल गरे । इटालीका सिरो इमोविलेले एक गोल फर्काए । डि ग्रोलसच भेस्टे नेदरल्यान्ड्समा खेलको तेस्रो मिनेटमा नै यारेमी पिनोको गोलबाट स्पेनले सुरुवाती अग्रता लिन सफल भयो ।
११औं मिनेटमा सिरो इमोविलेले पेनाल्टीमा गोल गर्दै खेललाई १–१ गोलको बराबरीमा ल्याए । २४औं मिनेटमा डाभिड फ्राटटेसीले गोल गरेपनि भिएआरबाट मान्यता नपाउँदा इटाली अग्रता लिनबाट चुक्यो ।
त्यसपछि अतिरिक्त समयतर्फ लम्बिएको खेलको ८८औं मिनेटमा जोसेलुले गोल गर्दै स्पेनलाई २–१ को जितसँगै फाइनलमा क्रोएसियासँगको भेट पक्का गरेको हो ।
अब स्पेनले उपाधिका लागि १८ जुनको राति क्रोएसियासँग खेल्नेछ । क्रोएसियाले बुधबारै नेदरल्यान्ड्सलाई ४–२ ले पराजित गरी फाइनल पुगिसकेको छ । इटालीले भने तेस्रो स्थानको लागि नेदरल्यान्ड्ससँग १७ जुनको राति खेल्नेछ ।
Published Date: 16 June 2023
