काठमाडौं, जेठ ३२ । अमेरिकाको केन्द्रीय बैंक ‘फेडरल रिजर्भ’ ले ब्याजदर स्थिर राख्ने भएको छ । फेडरल रिजर्भको बुधबार बसेको बैठकले १५ महिनाको निरन्तर वृद्धिपछि पहिलो पटक ब्यादर नबढाउने निर्णय गरेको हो ।
यसअघिको बैठकबाट निर्धारित ५%–५.२५% ब्यादर नै कायम राख्ने फेडरल रिजर्भले निर्णय गरेको छ । जुन सन् २००७ यताकै उच्च हो ।यद्दपि, हाललाई ब्याजदर स्थिर राख्ने निर्णय गरे पनि आगामी दिनमा ब्याजदर थप वृद्धि गर्ने बाटो खुला राखेकोे नीति निर्माताहरुले जानकारी गराएका छन् ।
बुधबारको बैठकमा सहभागी अधिकांश नीति निर्माताहरुले यस वर्षको अन्त्यसम्ममा ब्याजदर ५.६% सम्म पुग्ने अनुमान गरेका छन् । फेडरल रिजर्भको ब्याजदर स्थिर राख्ने निर्णयले तत्कालका लागि भने उपभोक्ताहरुलाई राहतको दिने देखिन्छ । यसअघि लगातार १० पटक ब्याजदर वृद्धि हुँदा ऋणीहरु महँगो धितो, क्रेडिट कार्ड र अन्य ऋणहरुबाट पीडित थिए ।
मुद्रास्फीति दर उच्च हुन थालेपछि फेडरल रिजर्भले सन् २०२२ को मार्च महिनादेखि निरत्नर ब्याजदर वृद्धि गर्दै आएको छ । यस वर्ष थप २ पटक ब्याजदर वृद्धि हुने र सन् २०२४ देखि ब्याजदर घट्ने अनुमान फेडरल रिजर्भको रहेको छ ।
Published Date: 15 June 2023
