काठमाडौं, जेठ २० । काठमाडौं महानगरपालिकाले सुरु गरेको ‘पुस्तकमुक्त शुक्रबार’ अभियानको अनुगमन गर्न उपमेयर सुनिता डंगोलको नेतृत्वमा रहेको काठमाडौं महानगरपालिकाका पदाधिकारीको टोलीले शुक्रबार महानगरका विभिन्न सामुदायिक विद्यालयको निरीक्षण गरेको छ ।
मेयर बलेन्द्र शाहले सुरु गरेको यो अभियानले शुक्रबार सामुदायिक विद्यालयमा विद्यार्थीहरूलाई अतिरिक्त क्रियाकलाप (ईसीए) मा पूर्ण रूपमा संलग्न गराउने सुनिश्चित गर्दछ।
शुक्रबार उपमेयरको नेतृत्वमा टोलीले तरुण मावि र शीतला माविको निरीक्षण गरेको मेयर शाहले सामाजिक सञ्जालमा लेखेका छन् ।
मेयर शाहका अनुसार तरुण माध्यमिक विद्यालयले ‘बुक फ्री फ्राइडे’ कार्यक्रम अन्तर्गत संगीत, चित्रकला, प्रश्नोत्तरी प्रतियोगितालगायतका कार्यक्रम आयोजना गरेको थियो । त्यसैगरी सोही विद्यालयमा ‘शिक्षासँग सीप’ कार्यक्रम अन्तर्गत विद्यार्थीहरुलाई मोबाइल तथा इलेक्ट्रोनिक उपकरण मर्मत, कृषि तथा सहरी खेती र पाक कला सिकाइएको थियो ।
त्यसैगरी शीतला माविले स्काउट र नेपाल भाषा सङ्गीत लगायतका विषयमा तालिम दियो भने विद्यालयले ‘शिक्षासँग सीप’ कार्यक्रम अन्तर्गत ब्यूटीशियन तालिम र हेयर स्टाइलिङ सम्बन्धी पाठ्यक्रमहरू सञ्चालन गर्दै आएको छ ।
मेयर शाहले यस क्षेत्रमा आफ्नो ज्ञान अभिवृद्धि गर्न पुरुष र महिला दुवै विद्यार्थीले ब्यूटीशियन कोर्षमा सहभागी हुने अपेक्षा गरेको बताउँछन् ।
भ्रमणका क्रममा उपमेयर डंगोलले शीतला स्कुलमा कोड क्लबको उद्घाटन गरेको उनले बताए । उनले नेपालको पहिलो विद्यालय स्तरको कोड क्लब भएको दाबी गरे ।
“यस क्लबका विद्यार्थीहरूले फुटबल र बास्केटबल खेल्ने मानिसहरूको कम्प्युटर एनिमेसन तयार गर्न सक्छन्,” शाहले लेखे। विद्यार्थीले विकास गरेका कार्यक्रमहरू विभिन्न १६० देशका विद्यालयमा आदान प्रदान गरिएको मेयर साहले दाबी गरे । उनले १४ वटा विद्यालयमा कोड क्लब स्थापना भइसकेको र महानगरपालिकाका प्रत्येक सामुदायिक विद्यालयमा यस्ता क्लब स्थापना गर्ने कामपाको योजना रहेको बताए ।
