काठमाडौं, जेठ १० । नेपाली चलचित्रकी कलाकार करिश्मा मानन्धर र कलाकार तथा चलचित्र निर्देशक आकाश अधिकारीलाई दादासाहेब फाल्के फिल्म अवार्ड २०२३ बाट सम्मानित गरिएको छ ।
नेपाली चलचित्र क्षेत्रमा अतुलनीय योगदान पुर्याएको भन्दै नेपाली कलाकार जोडीलाई उक्त प्रतिष्ठित अवार्डबाट सम्मान गरिएको हो । भारतको सूचना तथा प्रसारण मन्त्रालयले आयोजना गरेको कार्यक्रममा मानन्धरलाई उत्कृष्ट अभिनेत्री र अधिकारीलाई उत्कृष्ट निर्देशकको अवार्ड प्रदान गरिएको थियो ।
यो यस वर्षको अवार्डको ६९ औं संस्करण थियो।
सामाजिक सञ्जालमार्फत् मानन्धरले कृतज्ञता व्यक्त गर्दै लेखेकी छिन्, ‘कला एक विश्वव्यापी भाषा हो, जसले सिमाना नाघेर मानव जीवनलाई समृद्ध बनाउँछ ।
त्यस्तै, अधिकारीले मुम्बईलाई आफ्नो दोस्रो स्वर्ग ठानेको बताए । “मैले स्वर्गको बारेमा मात्र सुनेको छु। अहिलेसम्म देखेको छैन। मेरो देश नेपाल स्वर्ग जस्तै छ। त्यसपछि मुम्बई आउँछ जुन मेरो लागि अर्को स्वर्ग हो। त्यहीँबाट मैले सिक्ने र काम गर्ने मौका पाएँ,” उनले सामाजिक सञ्जालमा टिप्पणी गरे।
भारतका निर्माता, निर्देशक र पटकथा लेखक दादासाहेब फाल्केको नामबाट सम्मानित वार्षिक पुरस्कार, सिनेमामा उत्कृष्ट योगदानको कदर गर्दै प्रदान गरिन्छ।
