झापा, जेठ २ । नेपाल र भारतका सीमावर्ती जिल्लाका प्रशासक नो म्यान जग्गा खाली गर्न र भत्केका सीमास्तम्भ मर्मत गर्न सहमत भएका छन् ।
नेपाल–भारत सीमा जिल्ला समन्वय समितिको सोमबार भारतको किशनगञ्जमा बसेको बैठकमा नो म्यानजल्याण्डका संरचना हटाउने सहमति भएको छ । बैठकमा नेपाली टोलीको नेतृत्व मोरङका प्रमुख जिल्ला अधिकारी वीरेन्द्रकुमार यादव र भारतीय टोलीको नेतृत्व बिहार प्रदेशको किशनगञ्ज जिल्लाका मजिस्ट्रेट श्रीकान्त शास्त्रीले गरेका थिए ।
सो अवसरमा जिल्ला अधिकारी शास्त्रीले दुई देशको सिमानाबीचको नो म्यान जग्गालाई अतिक्रमणमुक्त बनाउने सहमति भएको बताए । खोलाले बगाएर हराएको सीमा स्तम्भ खोजी पुरानै स्थानमा पुर्नस्थापना गर्ने पनि सहमति भएको छ ।
त्यस्तै मोरङका प्रमुख जिल्ला अधिकारी यादवले दुवै देशका सीमावर्ती क्षेत्रका अधिकारीबीच १४ वटा विषयमा सौहार्दपूर्ण छलफल भएको बताए । हात्तीको आतंक, लागुऔषधको व्यापार, मानव बेचबिखन, तस्करी जस्ता महत्वपूर्ण विषयलाई नियन्त्रण गर्न नेपालले भारतीय पक्षलाई आग्रह गरेको उनले बताए । ‘सीमा क्षेत्रमा हुने आपराधिक घटनालाई नियन्त्रण गर्न सहयोग गर्ने सहमति भएको छ,’ उनले भने ।
बैठकमा सीमा क्षेत्रमा आवतजावत गर्ने सवारीसाधनको नियमित चेकजाँच र अपराधी पक्राउका लागि सूचना आदानप्रदान गर्ने विषयमा पनि छलफल भएको झापा जिल्लाका प्रहरी उपरीक्षक दुर्गाराज रेग्मीले जानकारी दिए ।
नेपाल र भारतको झापामा ११८ किलोमिटर र मोरङमा ५३ किलोमिटर लामो सीमा क्षेत्र रहेको छ ।
Published Date: 16 May 2023
