लन्डन, बैशाख १९ । लेस्टर सिटी र एभर्टनले इंग्लिस प्रिमियर लिगमा बराबरी खेल्दै अंक बाँडेका छन् । लेस्टर र एभर्टनले २–२ गोलको बराबरी खेलेको हो । दुवै टिम रेलिगेसनबाट बच्न संघर्षरत छन् । यो नतिजापछि लेस्टर ३० अंकमा १६ औं स्थानमा उक्लेको छ ।
लेस्टरका काग्लर सोयुन्कु र जेमी भार्डीले गोल गर्दा एभर्टनका डोमिनिक काल्भर्ट लेविन र एलेक्स इओवीले बराबरी गोल फर्काए ।
किङ्स पावर स्टेडियम लेस्टरमा सोमबार राति भएको खेलको १५औं मिनेटमा डोमिनिक काल्भर्ट लेविनले गोल गर्दै एभर्टनलाई १–० को अग्रता दिलाए । त्यसपछि लेस्टरले १२ मिनेटको अन्तरमा दुई गोल गर्दै अग्रता लिन सफल भएपनि त्यसलाई जोगाउन सकेन ।
२२औं मिनेटमा काग्लरले गोल गर्दै खेललाई १–१ गोलको बराबरीमा ल्याए । ३३औं मिनेटमा जेमी भार्डीले गोल गरेपछि लेस्टरले खेलमा २–१ को अग्रता लिन सफल भयो ।
पहिलो हाफको इन्ज्युरी समयको थप गरिएको नवौं मिनेटमा जेम्स म्याडिसन पेनाल्टीमा चुक्दा टोलीले थप अग्रता बढाउन सकेन । त्यसपछि ५४औं मिनेटमा एलेक्स इओवीले गोल गर्दै एभर्टनलाई हारबाट जोगाए ।
यस बराबरीसँगै लेस्टर ३४ खेलबाट ३० अंक जोडेर १६औं स्थानमा छ । टोली रेलिगेसन जोनको लिड्स र नटिङहम फरेस्टसँग अंक बराबरी भएपनि गोल अन्तरमा अघि छ । एभर्टन ३४ खेलबाटै २९ अंक जोडेर १९औं स्थानमा छ । –एजेन्सी
Published Date: 02 May 2023
