काठमाडौं, वैशाख १८ । सङ्घीय मामिला तथा सामान्य प्रशासन मन्त्रालयले दूरसञ्चार सेवा प्रदायक कम्पनीले जोडिएका नेटवर्कका तारहरु जथाभावी नकाट्न देशभरका स्थानीय तहलाई परिपत्र जारी गरेको छ ।
नेपाल टेलिकमले सहरी सौन्दर्य कायम गर्ने नाममा स्थानीय तहले जथाभावी नेटवर्क र इन्टरनेटका तार काट्न थालेको भन्दै समन्वय गर्न सूचना तथा सञ्चार प्रविधि मन्त्रालयमार्फत सहयोग गर्न आग्रह गरेको थियो ।
टेलिकमको सोही पत्रअनुसार सञ्चार तथा सूचना प्रविधि मन्त्रालयले सङ्घीय मामिला मन्त्रालयलाई स्थानीय तहसँग समन्वय गरी समस्या समाधान गर्न आग्रह गरेको थियो ।
‘काठमाडौं महानगरपालिकासहित विभिन्न स्थानीय तहले सहरी सौन्दर्य कायम राख्न यस कम्पनीले विस्तारित नेटवर्कको तार जथाभावी काटिरहेका छन्, जसले गर्दा कम्पनीले दिने टेलिफोन, इन्टरनेट र टेलिभिजन सेवा अवरुद्ध भइरहेको छ । ग्राहक सेवाबाट वञ्चित भइरहेका छन्,’ पत्रमा भनिएको छ ।
स्थानीय तहले काटेको केबल नेटवर्क पुनःस्थापना गर्न विदेशबाट ठूलो परिमाणमा केबुल आयात गर्नुपर्ने भएकाले सेवा नियमित गर्न बढी समय र खर्च लाग्ने पत्रमा उल्लेख छ ।
सहरी सौन्दर्यीकरणको काम गर्दा कम्पनीको स्थानीय कार्यालयसँग समन्वय गर्न पनि भनिएको छ ।
Published Date: 01 May 2023
