काठमाडौं, वैशाख १४ । लुम्बिनीमा नयाँ सरकार गठनका लागि प्रदेश प्रमुखले दिएको समयसीमा आज अपराह्न ४ बजे सकिँदैछ ।
प्रदेश प्रमुख अमिक शेरचनले मंगलबार साँझ संविधानको धारा १६८ बमोजिम सरकार गठन गर्न आह्वान गरेका हुन् । प्रदेश प्रमुखको आह्वानसँगै प्रदेशसभाका विपक्षी दल नयाँ सरकारको नेतृत्वका लागि आन्तरिक छलफलमा जुटेका छन् । गठबन्धनबीच मंगलबार र बुधबार छलफल भए पनि नयाँ सरकार र नेतृत्वका विषयमा सहमति हुन सकेको छैन ।
एक महिनाअघि प्रमुख प्रतिपक्षी दलहरुले नेपाली कांग्रेस संसदीय दलका नेता डिल्लीबहादुर चौधरीलाई मुख्यमन्त्रीमा प्रस्ताव गरेका थिए । उनीहरुले संविधानको धारा १६८ (२) बमोजिम सरकार गठन हुनुपर्ने दाबी समेत गरेका छन् । तर माओवादी केन्द्र दोस्रो कार्यकालका लागि मनाउन नसकेपछि बुधबार पनि सहमति हुन सकेन ।
कांग्रेस प्रमुख सचेतक जन्मदेव तिमिलसेनाले प्रदेश प्रमुखले नयाँ सरकार गठनका लागि दिएको समयावधिभित्र सरकारको नेतृत्वमा दाबी गर्ने तयारी भइरहेको बताए ।
प्रमुख सचेतक तिमिल्सेनाले वाम गठबन्धन दलहरूबीच सत्ता बाँडफाँडको विषयमा विभिन्न चरणमा छलफल भए पनि समाधान हुन नसकेको संकेत गरे । उनले नयाँ सरकारका लागि दाबी राखेर वार्ताबाटै समस्या समाधान हुने दाबी गरे ।
नेकपा एमाले संसदीय दलका नेता एवम् मुख्यमन्त्री लीला गिरीले सोमबार प्रदेशसभामा विश्वासको मत जित्न नसकेपछि एमाले नेतृत्वको सरकार ढल्यो । संविधानको धारा १८६ को उपधारा २ बमोजिम गिरीलाई माघ ११ गते मुख्यमन्त्रीमा नियुक्त गरिएको हो ।
