काठमाडौं, वैशाख ८ । अस्ट्रेलियाका लागि नेपाली राजदूत कैलाशराज पोखरेलले शुक्रबार अस्ट्रेलियाको रिजर्भ बैंकका गभर्नर फिलिप विलियम लोभसँग भेटवार्ता गरेका छन् । उनीहरुबीच मैत्रीपूर्ण वातावरणमा नेपाल र अष्ट्रेलियाको बैंकिङ आबद्धताका सम्भावनालगायत आपसी हितका विविध विषयमा छलफल भएको थियो ।
राजदूत पोखरेलले अष्ट्रेलियामा बढ्दो नेपाली समुदायको बारेमा गभर्नरलाई जानकारी दिँदै अष्ट्रेलियाबाट नेपाल आउने रेमिट्यान्सलाई सहज बनाउन आग्रह गरे । राजदूत पोखरेलका अनुसार गभर्नर लोवेले यो विषयलाई सकारात्मक रुपमा लिएको छ ।
उनले दुवै देशका वाणिज्य बैंकहरूबीच बैंकिङ सम्बन्ध स्थापना गर्न सहजीकरण गर्न गभर्नरसँग आग्रह गरे । बैठकमा सहायक गभर्नर (बिजनेस सर्भिसेज) मिशेल म्याकफी, अस्ट्रेलियन रिजर्भ बैंकका बैंकिङ प्रमुख माइकल प्लम्ब र अवैतनिक महावाणिज्यदूत दीपककुमार खड्का पनि उपस्थित थिए ।
