काठमाडौं, वैशाख ७ । प्रधानमन्त्री पुष्पकमल दाहाल र तीन पूर्वप्रधानमन्त्रीले आज चितवनमा चुनावी सभालाई सम्बोधन गर्ने कार्यक्रम छ ।
वैशाख १० गते हुने उपनिर्वाचनलाई लक्षित गरी वाम लोकतान्त्रिक गठबन्धनले आयोजना गरेको चुनावी सभा पूर्वी चितवनको कालिका नगरपालिका–४ मा भइरहेको नेपाली काँग्रेस चितवनका सचिव सूर्य अर्यालले जानकारी दिए ।
सभालाई प्रधानमन्त्री दाहाल, पूर्वप्रधानमन्त्रीहरु नेपाली कांग्रेसका सभापति शेरबहादुर देउवा, नेकपा (एकीकृत समाजवादी)का अध्यक्ष माधवकुमार नेपाल र नेपाल समाजवादी पार्टीका अध्यक्ष डा बाबुराम भट्टराईले सम्बोधन गर्ने कार्यक्रम रहेको छ ।
त्यसैगरी नेपाली कांग्रेसका नेता विश्वप्रकाश शर्मा र डा शेखर कोइरालाले पनि सम्बोधन गर्ने छन् । सभास्थलमा प्रधानमन्त्री दाहाल हेलिकप्टरबाट अवतरण गर्ने र सम्बोधन गरेलगत्तै सिधै काठमाडौं फर्किने प्रमुख जिल्ला अधिकारी सुरेन्द्र पौडेलले जानकारी दिए । उपनिर्वाचनमा चितवन क्षेत्र नं २ बाट सत्तारुढ गठबन्धनका तर्फबाट कांग्रेसका जितनारायण श्रेष्ठ उम्मेदवार छन् ।
