वीरेन्द्रनगर, वैशाख ६ । कर्णाली प्रदेशमा मन्त्रालयको संख्या आठ पुगेको छ । तत्कालीन नेकपा एमाले र नेकपा (माओवादी केन्द्र)को गठबन्धन सरकारले गत माघ ११ गते प्रदेशमा मन्त्रालयको सङ्ख्या घटाएर सात बनाएको थियो ।
मङ्गलबार साँझ बसेको प्रदेश मन्त्रिपरिषद्को बैठकले प्रदेशमा मन्त्रालयको सङ्ख्या परिमार्जन गर्ने निर्णय गरेको प्रदेश सरकारका प्रवक्ता एवं आन्तरिक मामिला तथा कानूनमन्त्री कृष्णबहादुर जिसीले जानकारी दिए ।
प्रदेश सरकारको कार्य महाशाखाको अनुसूची १ र २ मा परिवर्तन गरी भौतिक पूर्वाधार तथा जलस्रोत मन्त्रालयलाई भौतिक पूर्वाधार तथा शहरी विकास मन्त्रालय र ऊर्जा तथा जलस्रोत मन्त्रालय गरी दुईवटा मन्त्रालयमा विभाजन गरिएको छ ।
त्यसअनुसार भौतिक पूर्वाधार मन्त्रालयको १३ र ऊर्जा तथा जलस्रोत मन्त्रालयको १२ जिम्मेवारी रहेको छ ।
बैठकले प्रादेशिक सडक विधेयक तर्जुमा गर्न भौतिक पूर्वाधार मन्त्रालयलाई सैद्धान्तिक स्वीकृति दिने निर्णय गरेको मन्त्री जिसीले बताए ।
