नेपालगन्ज, वैशाख ५ । बाँकेको दोस्रो ठूलो सहर कोहलपुरमा सपिङ कम्प्लेक्ससहितको सुविधासम्पन्न बसपार्क निर्माण गरिएको छ ।
कोहलपुर नगरपालिकाले नगर विकास कोषको ऋण ठेक्कामा बसपार्क निर्माण गरेको हो । बसपार्कलाई छिट्टै सञ्चालनमा ल्याउने तयारी भइरहेको नगरपालिका स्रोतले जनाएको छ ।
कोहलपुर नगरपालिकाका प्रमुख कार्यकारी अधिकृत टीकाराम ढकालले बसपार्किङ, टिकट काउन्टर, सपिङ कम्प्लेक्सलगायत ५९ वटा व्यवसायिक शटर निर्माण सम्पन्न भएको जानकारी दिए।
उनले बसपार्कमा तीनवटा प्लेटफर्म रहेको बताए । बसपार्कभित्र व्यवसायिक शटरसहित स्वास्थ्य चौकी, बैंक तथा सुरक्षा चौकीको व्यवस्था गरिने उनले जानकारी दिए ।
कोहलपुर चौराहाको कुनामा निर्माण गरिएको बसपार्कमा तीन दर्जनभन्दा बढी लामो तथा छोटो दुरीका सवारी साधन राख्न सक्ने क्षमता रहेको छ ।
ठेकेदारले बसपार्क निर्माण सम्पन्न गरी छिट्टै नगरपालिकालाई हस्तान्तरण गर्ने उनले बताए ।
कोहलपुर नगरपालिकाका मेयर पूर्ण आचार्यले बसपार्क निर्माण सम्पन्न भएपछि नेपालगन्ज र कोहलपुरबाट देशभर यातायात सेवा सञ्चालन गरिने बताए ।
