काठमाडौं, वैशाख ४ । काठमाडौंको शान्तिवाटिकामा प्रहरी र मिटर ब्याजपीडितबीच झडप भएको छ । झडपमा ऋण लिने केही घाइते भएका छन् भने केहीलाई प्रहरीले नियन्त्रणमा लिएको छ ।
शान्तिवाटिकामा बसेर आन्दोलनमा उत्रिएका मिटर ब्याजपीडितले सोमबार सिंहदरबार आसपास प्रदर्शन गर्ने तयारी गरेका छन् । त्यसैले शान्तिवाटिकाको गेटमा बिहानैदेखि प्रहरीले पहरा दिएको थियो । दिउँसो ब्यानर बोकेर विरोध प्रदर्शन गर्न निस्किएका आन्दोलनकारीलाई प्रहरीले रोकेपछि झडप भएको हो ।
प्रहरीले पानीको फोहोरा र लाठी चार्ज समेत गरेको थियो ।
प्रत्यक्षदर्शीका अनुसार प्रहरीको लाठी प्रहारबाट चारदेखि पाँच जना घाइते भएका छन् भने केहीलाई प्रहरीले नियन्त्रणमा लिएको छ ।
घाइतेहरुको राष्ट्रिय ट्रमा सेन्टरमा उपचार भइरहेको छ । सरकारले चैत १८ गते ऋण पीडितहरुको समूहसँग पाँच बुँदे सहमति गरेको थियो ।
तर, सम्झौताले ऋण पीडितको तत्काल समस्या समाधान नहुने भन्दै ऋण पीडितको अर्को समूह काठमाडौंमा आन्दोलनमा उत्रिएको छ ।
