काठमाडौं, चैत २३ । नेपाल आयल निगमले हवाई इन्धनको मूल्य घटाएपछि हवाई सेवा कम्पनीले पनि उडानको भाडा घटाएका छन् । निगमले सोमबार हवाई इन्धनको मूल्य प्रतिलिटर १० रुपैयाँ घटाएको हो ।
हवाई सेवा कम्पनीहरूले रुटका आधारमा भाडा घटाएर न्यूनतम रु ९० र अधिकतम रु चार सय ४० घटाएको छ ।
नेपाल नागरिक उड्डयन प्राधिकरणका अनुसार काठमाडौं–धनगढीको हवाई भाडामा सबैभन्दा बढी ४ सय ४० रुपैयाँ र सबैभन्दा कम काठमाडौं–सिमरा रुटको हवाई भाडामा ९० रुपैयाँले घटेको छ ।
निगमले आन्तरिक रूपमा हवाई इन्धन प्रतिलिटर १७० रुपैयाँबाट १० रुपैयाँले घटाएर १६० रुपैयाँमा घटाएको हो । नेपाल वायुसेवा निगम, बुद्ध एयर, श्री एयरलाइन्स, यती, समिट एयर, तारा एयर, सीता एयर, सौर्य एयरलाइन्स लगायतका कम्पनीले हवाई भाडा घटाएका छन् ।
Published Date: 06 April 2023
