काठमाडौं, चैत २३ । संखुवासभाको किमाथाङ्कामा रहेको नेपाल–चीन सीमा नाका पुनः खोल्न माग गर्दै प्रधानमन्त्री पुष्पकमल दाहाललाई ज्ञापनपत्र बुझाइएको छ ।
भोटखोला गाउँपालिकाका अध्यक्ष वाङछोडर भोटले बुधबार प्रधानमन्त्री दाहाललाई ज्ञापनपत्र बुझाएका हुन् । कोभिड–१९ को महामारी फैलिएपछि विगत तीन वर्षदेखि नाका बन्द रहेको छ ।
लामो समयदेखि किमाथाङ्का नाका बन्द हुँदा भोटखोलावासीले सास्ती भोग्नु परेको अध्यक्ष भोटले बताए । संखुवासभाको सदरमुकाम खाँदबारी पुग्न भोटखोलाका बासिन्दा चारदेखि पाँच दिनसम्म पैदल हिँड्नुपर्ने बाध्यता रहेको छ ।
भोटले प्रधानमन्त्री दाहाललाई जतिसक्दो चाँडो नाका खोल्न पहल गर्न आग्रह गरेको बताए । लामो समयदेखि नाका बन्द हुँदा जनताको दैनिकी प्रभावित भएको र भोकमरी पर्न सक्ने भन्दै प्रधानमन्त्रीको ध्यानाकर्षण गराएको भोटले बताए ।
सो अवसरमा दाहालले नाका खोल्नका लागि आवश्यक पहल गर्ने आश्वासन दिए।
