काठमाडौँ, चैत १२ । विंगर रेनाटो स्टेफेनको ह्याट्रिक सहयोगमा स्वीट्जरल्यान्ड युरो २०२४ को छनोटमा सानदार जित निकालेको छ ।
स्वीट्जरल्यान्डले बेलारुसमाथि ५–० को फराकिलो जित निकालेको हो । ग्रानिट झाँका र जेकी एमडोउनीले समान एक गोल गरे । नोभी स्याड सर्वियामा शनिबार राति गोलको वर्षाको भएको खेलमा रेनाटो स्टेफेनले २९ मिनेटभित्रै ह्याट्रिक पूरा गरेका थिए ।
चौथो मिनेटमा पहिलो गोल गरेका स्टेफेनले १७औं र २९औं मिनेटमा गोल गर्दै ह्याट्रिक पूरा गरे । रेनाटोले तेस्रो गोल रिकार्डाे रोड्रिग्वेजको पासमा गोल गर्न सफल भएका थिए ।
त्यसपछि स्वीट्जरल्यान्डले दोस्रो हाफमा दुई गोल थप्दै फराकिलो जित दर्ता गर्न सफल भयो । ६२औं मिनेटमा ग्रानिटले गोल गर्दै स्वीट्जरल्यान्डलाई ४–० को अग्रता दिलाए । उनले नोआ ओकाफोरको पासमा गोल गरेका थिए ।
त्यसपछि ६५औं मिनेटमा जेकीले गोल गर्दै स्वीट्जरल्यान्डको फराकिलो जित पक्का गरे । उनले ग्रानिट झाँकाको पासलाई सदुपयोग गरे । यस जितसँगै स्वीट्जरल्यान्डले समूह ‘आईं’ मा ३ अंक जोडेको छ । बेलारुस अंकविहीन हुँदै पुछारमा छ ।
यही समूहका अर्काे खेलमा रोमानियाले एन्डोरालाई २–० ले पराजित गर्दा इजरायल र कोसोभोले १–१ गोलको बराबरी खेल्दै अंक बाँडेका छन् । –एजेन्सी
