हेटौँडा, चैत १० । वाग्मती प्रदेशका मुख्यमन्त्री शालिकराम जमकट्टेलले शुक्रबार वाग्मती प्रदेशसभाबाट विश्वासको मत लिएका छन् ।
मतदानमा उनले आफ्नो पक्षमा ६७ मत प्राप्त गरे । १७ प्रदेशसभा सदस्यले उनको विपक्षमा मतदान गरे पनि सात सदस्यले तटस्थ रहने निर्णय गरे । ११० सदस्यीय प्रदेश सभामा ९१ जनाले मतदानमा भाग लिएका थिए ।
वाग्मती प्रदेशमा नेपाली कांग्रेसबाट ३७, नेकपा एमालेबाट २७, नेकपा (माओवादी केन्द्र)बाट २१, राष्ट्रिय प्रजातन्त्र पार्टीबाट १३, नेकपा (एकीकृत समाजवादी) सात, नेपाल मजदुर किसान पार्टी तीन र दुई जनाले हाम्रो नेपाली पार्टीको प्रतिनिधित्व गरेका छन् ।
राप्रपा र एमालेले जमकट्टेल नेतृत्वको सरकारलाई दिएको समर्थन फिर्ता लिने निर्णय गरेपछि उनले संविधानको धारा १८८ को उपधारा २ बमोजिम प्रदेश सभाबाट विश्वासको मत लिएका हुन् ।