काठमाडौं, चैत्र ३ । एजेन्सी – इंग्लिस क्लब म्यानचेस्टर युनाइटेड युरोपा लिगको क्वाटरफाइनलमा प्रवेश गरेको छ । स्पेनिस क्लब रियल बेटिसलाई १–० ले तथा समग्रमा ५–१ ले पराजित गर्दै अन्तिम आठमा पुग्न सफल भएको हो ।
पहिलो लेगमा युनाइटेडले ४–१ को सहज जित हात पारेको थियो । दोस्रो लेगमा युनाइटेडको जितमा दोस्रो हाफमै मार्कस रासफर्डले गरेको गोल निर्णायक बन्यो । उनले ५६औं मिनेटमा क्यासमिरोको पासमा गोल गर्न सफल भएका थिए ।
सेभिल्लामा बिहीबार राति भएको खेलमा बेटिस घरेलु मैदानमा युनाइटेडसँग दवावमा रहेर खेलेको थियो । यता, अर्काे खेलमा फेनरवाचसँग दोस्रो लेगमा १–० ले पराजित भएपनि समग्रमा २–१ को जितसँगै स्पेनिस क्लब सेभिया क्वाटरफाइनलमा पुगेको छ ।
फेनरवाचका एनर भ्यालेन्सियाले ४१औं मिनेटमा पेनाल्टीमार्फत टोलीलाई खेलमा फर्काउने संकेत दिएपनि त्यसपछि थप गोल निस्कन नसक्दा सेभिया पहिलो लेगमा पाएको २–० को जितले अघि बढ्न पर्याप्त बन्यो ।
