भक्तपुर, असोज २५ । जनता बाँचे भाषा बाँच्छ भन्ने मूल उद्घोषका साथ आयोजना हुन लागेको ४६औँ नेपाल भाषा साहित्य तःमुज्याको प्रचारार्थ आज भक्तपुरको दरबार क्षेत्रमा सामूहिक बाँसुरी वादन तथा नृत्य प्रदर्शन गरिएको छ।
अपराह्न ४ बजे आयोजित कार्यक्रममा १५० जना बाँसुरीवादकले एकसाथ बाँसुरीको धुन प्रस्तुत गरेका थिए। सोही धुनको तालमा १५० जना कलाकारले दरबार क्षेत्र परिसरमा सामूहिक नृत्य प्रस्तुत गरेका थिए। नेपाल भाषा र मौलिक कला, संस्कृति र संगीतको प्रवर्द्धन गर्ने उद्देश्यले आयोजित उक्त प्रस्तुतिले भक्तपुरको सांस्कृतिक रौनक थपेको थियो।
४६औँ नेपाल भाषा साहित्य तःमुज्या आगामी कार्तिक ६ र ७ गते भक्तपुरको गोमारी टोलमा आयोजना हुँदैछ। कार्यक्रमको प्रचारप्रसारलाई थप प्रभावकारी बनाउन आयोजक संस्थाले कार्तिक ५ गते बिहीबार सुन्कुन्दा र्यालीसमेत आयोजना गर्ने जनाएको छ।
नेपाल भाषा, साहित्य, कला तथा संस्कृतिको संरक्षण र प्रवर्द्धनमा योगदान पुर्याउँदै आएको तःमुज्यालाई सफल बनाउन विभिन्न सांस्कृतिक गतिविधिहरू सञ्चालन भइरहेका छन्।
Published Date: 11 October 2026
