काठमाडौँ, साउन १४ । कारोबारको चौथो दिन बिहीबार पनि सेयरबजार परिसूचक नेप्से ओरालो लागेको छ । आज नेप्से १६.२९ अंकले घटेर २ हजार ६७२.५८ विन्दुमा कायम भएको छ । आज ‘क’ वर्गका कम्पनीहरुको कारोबार मापक सेन्सेटिभ इण्डेक्स् पनि २.३१ विन्दुले घटेको छ । आज सेयरबजारमा ३३७ कम्पनीका सेयर कारोबार भएका छन् ।
यी मध्ये ५९ कम्पनीका सेयरमूल्य बढेका छन् भने २०६ कम्पनीका सेयरमूल्य घटेका छन् । बाँकी ११ कम्पनकिा सेयरमूल्य भने स्थिर रहेका छन् । आज कुल ७५ लाख ४८ हजार ५९१ कित्ता सेयर ४४ हजार ६५१ कारोबारबाट ३ अर्ब ३८ करोड १३ लाख १८ हजार रुपैयाामा किनबेच भएको छ । कारोबार रकम बुधबारको तुलनामा १६ प्रतिशतले कमी हो । बुधबार ४ अर्ब २ करोड ९३ लाख ३१ हजार रुपैयाँ बराबरका सेयर कारोबार भएका थिए । आज सेयरबजारमा सूचीकृत सबै समूहका परिसूचक ओरालो लागेका छन् ।
सबैभन्दा धेरै जलविद्युत समूहको परिसूचक १.२० प्रतिशतले घटेको छ । एभरेष्ट कलर लिमिटेडको सकारात्मक सर्किट लागेको छ । यस्तै, सेन्ट्रल फाइनान्स कम्पनी, सुभम पावर लिमिटेड, तारागाउँ रिजेन्सी होटेल तथा एनएमवी हाइव्रीड फण्डका सेयरधनीले सबैभन्दा बढी कमाएका छन् ।
सबैभन्दा बढी गुमाउनेमा भने कालिञ्चोक हाइड्रोपावर, कर्पोरेट डेभलपमेन्ट बैंक, सोलु हाइड्रोपावर, ग्लोबल आइएमई समुन्नत योजना तथा रिज लाईन इनर्जीका सेयरधनी रहेका छन् । कारोबार रकमका आधारमा रिलायन्स् स्पिनिङ मिल्स् अग्र स्थानमा रहेको छ । यो कम्पनीका २४ करोड ३८ लाख ४३ हजार रुपैयाँ बराबरका सेयर कारोबार भएका छन् । यस्तै, सेयर कारोबार संख्याको आधारमा खानीखोला हाइड्रोपावर पहिलो स्थानमा छ । यो कम्पनीको ३ लाख ५४ हजार ७६५ कित्ता सेयर कारोबार भएका छन् ।
Published Date: 30 July 2026
