काठमाडौं, फागुन १० । राष्ट्रिय दुग्ध विकास बोर्डले ऐन विपरीत दूधको मूल्य बढाउन प्रस्ताव गरेको छ । दाना चोकर, मुद्रास्फीति, ढुवानी खर्च, उद्योगीको खर्च बढेको भन्दै बोर्डले उपभोक्तालाई भार पर्नेगरी दूधको मूल्य प्रतिलिटर १० रुपैयाँ बढाउन कृषि तथा पशुपन्छी विकास मन्त्रालयमा प्रस्ताव गरेको हो ।
राष्ट्रिय दुग्ध विकास ऐन तथा नीति अनुसार दुई/दुई वर्षमा मात्रै बजार मूल्य समायोजन गर्न मिल्छ । तर, बोर्डले नै ऐन विपरीत दूधको मूल्य बढाउन प्रस्ताव गरिएको हो । बोर्डका कार्यकारी निर्देशक राजेन्द्र प्रसाद यादवले किसान, उद्योगी, बजारको अध्ययन गरेर अध्ययन समितिले दूधमा प्रतिलिटर १० रुपैयाँ बढाउन प्रस्ताव सहितको प्रतिवेदन मन्त्रालयमा बुझाएको बताए ।
यसअघि २०७८ माघ २८ मा दूधको फ्याटका आधारमा प्रतिलिटर ९ देखि १४ रुपैयाँसम्म मूल्यवृद्धि भएको थियो । मूल्यवृद्धिको कारण देखाउँदै डेरी उद्योग संघले गत पुस १६ मा एकलौटी रुपमा प्रतिलिटर १४ रुपैयाँ बढाएको थियो । चौतर्फी विरोधपछि संघले मूल्यवृद्धि स्थगन गरेको थियो । लागत बढेकै कारण सरकारले २०७८ माघ २८ मा कच्चा दूधको मूल्य प्रतिलिटर ६ रुपैयाँ ५२ पैसा बढाएको थियो ।
