काठमाडौँ, चैत १ । साताको पहिलो दिन आइतबार सेयरबजार परिसूचक नेप्सेमा सामान्य सुधार आएको छ । आज नेप्से ४.४५ अंकले बढेर २ हजार ८२४.९० विन्दुमा कायम भएको हो । आज सेयरबजारमा ३५० कम्पनीका सेयर कारोबार भएका छन् । यी मध्ये १२४ कम्पनीका सेयरमूल्य बढेका छन् भने १३० कम्पनीका सेयरमूल्यमा गिरावट आएको छ ।
कुल ३ करोड ९५ लाख ४९ हजार ३३ कित्ता सेयर १४ अर्ब ३२ करोड ९६ लाख चार हजार रुपैयाँमा किनबेच भएको छ । कारोबार रकम गत विहीबारको तुलनामा १.५३ प्रतिशतले कमी हो । आज सेयरबजारमा सूचीकृत समूहगत पसिरसूचकमध्ये वाणिज्य बैंक, विकास बैंक, वित्त, जलविद्युत, उत्पादनशील, लघुवित्त, निर्जीवन बीमा, व्यापार तथा अन्य समूहका परिसूचक सकारात्मक रहेका छन् ।
सबैभन्दा धेरै व्यापर समूहको परिसूचक २.८३ प्रतिशतले बढेको छ । यस्तै, होटेल तथा पर्यटन, लगानी, जीवन बीमा तथा म्युचुअल फण्ड समूहका परिसूचक भने ओरालो लागेका छन् । सोलु हाइड्रोपावर लिमिटेड,सालपा विकास बैंक तथा होटेल फरेष्ट इनका सेयरधनीले सबैभन्दा बढी कमाएका छन् ।
सबैभन्दा बढी गुमाउनेमा भने दरमखोला हाइड्रो इजर्नी, खानीखोला हाइड्रोपावर कम्पनी तथा सिद्धार्थ इन्भेष्मेन्ट ग्रोथ स्किमका लगानीकर्ता रहेका छन् ।
