काठमाडौँ, माघ २० । साताको चौथो कारोबार दिन सेयरबजार परिसूचक नेप्सेमा सामान्य अंकको गिरावट आएको छ । बुधबार नेप्से १.६४ अंकले घटेर २ हजार ६८१.५० विन्दुमा कायम भएको हो । आज सेयरबजारमा ३२६ कम्पनीका सेयर कारोबार भएका छन् ।
यी मध्ये ११३ कम्पनीका सेयरमूल्यमा सुधार आएको छ भने १३४ कम्पनीका सेयरमूल्यमा गिरावट आएको छ । आज कुल १ करोड ६६ लाख ८२ हजार ६२६ कित्ता सेयर ७ अर्ब ४९ करोड ९७ लाख ४२ हजार रुपैयाँमा किनबेच भएको छ । कारोबार रकम मंगलबारको तुलनामा १३ प्रतिशतले कमी हो ।
आज सेयरबजारमा सूचीकृत समूहगत परिसूचक मध्ये विकास बैंक, वित्त, होटेल तथा पर्यटन, जलविद्युत, निर्जीवन बीमा,लगानी तथा व्यापार समूहको परिसूचक बढेका छन् । वाणिज्य बैंक, जीवन बीमा, उत्पादनशील, लघुवित्त, म्युचुअल फण्ड तथा अन्य समूहको परिसूचकमा भने गिरावट आएको छ ।
कालिञ्चोक दर्शन लिमिटेड, सुपर माइ हाइड्रोपावर तथा सुपर मादी हाइड्रोपावरका सेयरधनीले सबैभन्दा बढी कमाएका छन् । सबैभन्दा बढी गुमाउनेमा भने एचएलआइृ लार्ज क्याप फण्ड, रावा इनर्जी डेभलपमेन्ट लिमिटेड तथा गुराँस लघुवित्त वित्तीय संस्थाका सेयरधनी रहेका छन् ।
Published Date: 04 February 2026
