रवि लामिछाने–बालेन भेटवार्ता बाक्लिँदै, नयाँ राजनीतिक सहकार्यको संकेत

काठमाडौं, पुस ७ । राष्ट्रिय स्वतन्त्र पार्टी (रास्वपा) का सभापति रवि लामिछानेले पछिल्लो समय राजनीतिक भेटघाट र छलफललाई तीव्र बनाएका छन् । नख्खु कारागारबाट मुक्त भएलगत्तै उनले विभिन्न राजनीतिक नेतृत्व तथा पार्टीगत गतिविधिमा सक्रियता बढाएका हुन् ।

गत शुक्रबार उच्च अदालत बुटवलको आदेशपछि रिहा भएका लामिछाने चितवन हुँदै काठमाडौं आइपुगेका थिए । काठमाडौं आगमनको सोही दिन शनिबार उनले जेन–जी आन्दोलनका घाइते तथा शहीद परिवारसँग भेटघाट गरे ।

त्यसपछि आइतबार पार्टी कार्यालयमा स्वागत कार्यक्रम र आन्तरिक बैठकमा सहभागी भएका लामिछानेले प्रधानमन्त्री सुशीला कार्कीसहितको सरकारी टोलीसँग औपचारिक छलफल पनि गरेका थिए ।

यसैबीच उनले काठमाडौं महानगरपालिकाका मेयर बालेन्द्र शाह (बालेन) सँग दुईपटक भेटवार्ता गरिसकेका छन् । स्रोतका अनुसार हिजो भएको भेटवार्ता एक चरणको गम्भीर छलफलका रूपमा भएको थियो ।

छलफलमा मेयर बालेनको तर्फबाट उनका सहयोगी कुमार बेन र निश्चल बस्नेत सहभागी थिए भने रास्वपाको तर्फबाट उपसभापति डीपी अर्याल र केन्द्रीय सदस्य असिम साह सहभागी थिए ।

भेटमा बालेन पक्षबाट दर्ता गरिएको ‘देश विकास पार्टी’ र रास्वपाबीच आगामी दिनमा कसरी सहकार्य गर्दै अघि बढ्ने भन्ने विषयमा छलफल भएको सहभागी एकजनाले जानकारी दिए ।

‘हिजो र आज दुवै दिनको छलफल सकारात्मक रह्यो,’ स्रोतले भन्यो, ‘सहकार्यको मोडालिटी र एजेन्डाबारे छलफल जारी छ, तर ठोस निष्कर्ष भने आइसकेको छैन।’

स्रोतका अनुसार आगामी निर्वाचनमा बालेन शाहलाई प्रधानमन्त्रीको उम्मेदवारका रूपमा अघि सार्ने प्रस्ताव समेत बालेन पक्षबाट आएको छ ।

उनीहरू दुई दिनसम्म कमलपोखरीस्थित केन्द्रीय सदस्य असिम साहकै निवासमा छलफलमा बसेका थिए । रास्वपाका एक पदाधिकारीका अनुसार हाल पार्टीले विभिन्न दल तथा समूहसँग संवादलाई तीव्र बनाएको छ ।

‘करिब १० वटा दल र समूहसँग संवाद भइरहेको छ,’ ती पदाधिकारीले भने, ‘हामी अब आक्रामक ढंगले अघि बढ्ने तयारीमा छौं । एक–दुई दिनमै नयाँ राजनीतिक सन्देश आउन सक्छ।’

सभापति लामिछाने कारागारमा रहँदा रोकिएका केही राजनीतिक तयारीलाई पुनः गति दिन अहिले भेटवार्ता बढाइएको ती नेताले बताए ।

‘सर्तमा दुई सिट आउला कि नआउला भन्ने आधारमा एकता हुँदैन,’ उनले भने, ‘देशका लागि केही गर्ने सोच भएका शक्तिहरू एक ठाउँमा आउनुको विकल्प छैन।’