भक्तपुर, वैशाख १३ । स्वास्थ्य तथा जनसंख्या मन्त्री प्रदीप पौडेलले भक्तपुरस्थित शहीद धर्मभक्त राष्ट्रिय अंग प्रत्यारोपण केन्द्रलाई स्थानान्तरण गर्न सकिने चेतावनी दिएका छन् । बिहीबार केन्द्रको १३औं वार्षिकोत्सवको उद्घाटन गर्दै उनले केन्द्रको लागि आवश्यक जग्गा भक्तपुर जिल्लामा उपलब्ध नभए अन्यत्रै सारिने चेतावनी दिएका हुन् ।
एक उपयुक्त ठाउँसहित प्रस्ताव आएको खुलासा गर्दै उनले भक्तपुरमा जग्गा नपाए त्यो बिकल्पमा जान बाध्य हुने बताए । यद्यपि कता सार्ने भन्ने उनले स्पष्ट भने पारेनन् ।
मन्त्री पौडेलले केन्द्रको सेवा विस्तारका लागि सरकार आवश्यक पूर्वाधार निर्माणमा गम्भीर रहेको तर, स्थानीय तहले आवश्यक सहयोग नगरेको भन्दै भक्तपुरका स्थानीय सरकारमाथि प्रश्न उठाएका थिए ।
हाल भक्तपुर अस्पताल परिसरभित्र रहेको मानव अंग प्रत्यारोपण केन्द्रलाई चाँगुनारायण नगरपालिका वडा नं. ३ झौखेलमा स्थानान्तरण गर्ने प्रक्रिया वर्षौंदेखि अल्झिएको छ। त्यहाँ जग्गा पाएपनि केन्द्र सारिएको छैन । केन्द्रले उक्त जग्गा अनुपयुक्त भएको बताउदै आएको छ ।
कार्यक्रममा अतिथि तथा बागमती प्रदेशका सांसद सुरेश श्रेष्ठले चाँगुनारायण नगरपालिकाले झौखेलबाहेक सुडालमा रहेको ३५ रोपनी १२ आना जग्गा अस्पताललाई दिने निर्णय गरिसकेको जानकारी गराए । उक्त निर्णय मन्त्रिपरिषद्बाट अनुमोदन हुन बाँकी रहेको उनको भनाइ छ ।
सो अवसरमा केन्द्रका प्रमुख डा. पुकारचन्द्र श्रेष्ठले स्थान अभावका कारण मागअनुसार सेवा दिन नसकेको गुनासो गरेका थिए ।
भक्तपुर अस्पतालको जग्गा र भवन ओगटेर केन्द्र सञ्चालन हुँदा एकातर्फ केन्द्रलाई स्थान अभाव भएको छ भने भक्तपुर अस्पताल पनि खिम्चिनु परेको प्रति बागमती प्रदेश सरकारकी सचिव डा सुमित्रा गौतम नै असन्तुष्ट छिन् । भक्तपुर अस्पताल बागमती प्रदेश सरकार मातहत सञ्चालित छ भने अंग प्रत्यारोपण केन्द्रलाई संघीय सरकारले चलाइरहेको छ ।
कार्यक्रममा प्रमुख जिल्ला अधिकारी गोपालप्रसाद अर्याल, भक्तपुर प्रहरी प्रमुख रहेका एसपी माधव बुढाथोकी, केन्द्रका चिकित्सक, कर्मचारी र स्थानीय जनप्रतिनिधिहरूको सहभागिता थियो। – नन्स्टप खबरबाट साभार
