काठमाडौं, वैशाख ७ । राष्ट्रिय प्रजातन्त्र पार्टी (राप्रपा), नेपाल शिक्षक महासंघलगायतको आन्दोलनलाई मध्यनजर गरी आज काठमाडौंको सुरक्षा सतर्कता उच्च पारिएको छ ।
गएको फागुन अन्तिम हप्तादेखि दुई महिनाका लागि संसद भवन वरपर, सिंहदबार क्षेत्र, राष्ट्रपति र उपराष्ट्रपति कार्यालय, प्रधानमन्त्री निवास बालुवाटार र भद्रकाली क्षेत्रमा निषेधाज्ञा लागू गरिएको थियो । निषेधाज्ञा लागू भएका क्षेत्रमा पाँच जनाभन्दा बढी व्यक्ति भेला भएर नारा, जुलुस, धर्ना, घेराउ, प्रदर्शन गर्न पाइँदैन ।
तर, राप्रपाले आज राजसंस्था पुनर्स्थापनाको मागसहित काठमाडौंको निषेधित क्षेत्रमा प्रदर्शन गर्ने तयारी गरेपछि सुरक्षा व्यवस्था अलर्ट गरिएको हो । गएको चैत्र १५ गतेको प्रदर्शनको क्रममा पक्राउ परेकाहरुलाई तत्काल रिहाई नगरे सामूहिक गिरफ्तारी दिएर आन्दोलन चर्काउने नीति राप्रपाले लिएको छ । यता शिक्षकहरु १९औं दिनदेखि विभिन्न माग राखेर सडकमा उत्रिएका छन् ।
यसलाई मध्यनजर गरेर आज बिहानैदेखि सुरक्षा व्यवस्था कडा पारिएको हो । हाल निषेधित क्षेत्र आसपास १५ सय बढी प्रहरी परिचाल गरिएको छ । यो संख्या अझ बढ्न सक्ने बताइएको छ । त्यस्तै ट्राफिक प्रहरीले ट्राफिक व्यवस्थापनमा आवश्यक समन्वय गरिरहेको छ ।
Published Date: 20 April 2025
