काठमाडौं, चैत ९ । सेयर बजारमा यो साताभर गिरावट आएको छ । समीक्षा अवधिमा सेयर बजार परिसूचक ६७ दशमलव १७ अङ्कले घटेको छ । अघिल्लो साता २७३६ दशमलव ४८ विन्दुमा बन्द भएको सेयर बजार यो साता २६६९ दशमलव ३१ विन्दुमा झरेर बन्द भएको छ ।
आइतवार बजार परिसूचक २१ दशमलव ६३ अङ्कले घटेर ओरालो यात्रा प्रारम्भ गरेको बजार सोमवार १० दशमलव १४ अङ्कले घटेको थियो । मंगलवार ७ दशमलव ६६ अङ्कले घटेको थियो भने बुधवार १४ दशमलव ८८ अङ्कले घटेको थियो ।
यो साताको कारोबारको अन्तिम दिन बिहीवार पनि सेयर बजारमा १२ दशमलव ३८ को गिरावट आएको थियो ।
यो साता ग्रीन डेभलपमेन्ट बैङ्कको सेयर मूल्य ७ दशमलव ४६ प्रतिशतले वृद्धि भयो । गत साता १३६६ रुपैयाँमा बन्द भएको कम्पनीको बजार मूल्य यो साता १४६७ दशमलव ८७ रुपैयाँमा बन्द भएको छ ।
त्यस्तै दोस्रोमा अपर हेवाखोला हाइड्रोपावर कम्पनीको सेयर मूल्य ७ दशमलव ४४ प्रतिशतले वृद्धि भएको छ । गत साता ८२७ रुपैयाँमा बन्द भएको कम्पनीको बजार मूल्य यो साता ८८८ दशमलव ५५ रुपैयाँमा बन्द भएको छ ।