टिकटकले आगामी आइतबारदेखि अमेरिकामा आफ्नो एप बन्द गर्ने तयारी गर्दै

काठमाडौं, माघ २ । अमेरिकामा प्रतिबन्ध लागू भएमा टिकटकले आगामी आइतबारदेखि त्यहाँका प्रयोगकर्ताहरुका लागि आफ्नो एप बन्द गर्ने तयारी गरेको छ । द इन्फर्मेसनको रिपोर्टअनुसार यो कदम अमेरिकाको सर्वोच्च अदालतले एपको प्रतिबन्ध रोक्नलाई कुनै कदम नउठाएमा लिइनेछ ।

हालको कानुनले एप्पल र गुगलका एप स्टोरहरुमा टिकटकको नयाँ डाउनलोडमा प्रतिबन्ध लगाउने प्रावधान राखेको छ । तर हालका प्रयोगकर्ताहरुलाई केही समयसम्म एप प्रयोग गर्न अनुमति दिइनेछ । टिकटकको प्रस्तावित योजनाअनुसार एप खोल्न प्रयास गर्ने प्रयोगकर्ताहरुले प्रतिबन्धबारे जानकारी पाउनेछन् । टिकटकले प्रयोगकर्ताहरुलाई आफ्नो व्यक्तिगत जानकारीको अभिलेख राख्नका लागि सबै डेटा डाउनलोड गर्नलाई विकल्प प्रदान गर्ने योजना पनि बनाएको रोयटर्सले जनाएको छ ।

टिकटक वा यसको चिनियाँ माउ कम्पनी बाइटडान्सले रोयटर्सको प्रतिक्रिया अनुरोधमा तत्काल कुनै टिप्पणी गरेका छैनन् । अप्रिल २०२४ मा, राष्ट्रपति जो बाइडेनले बाइटडान्सलाई १९ जनवरी २०२५ सम्ममा आफ्नो अमेरिकी सम्पति बेच्न वा देशव्यापी प्रतिबन्धको सामना गर्न कानुनी रुपमा बाध्य बनाउने सम्झौतामा हस्ताक्षर गरेका थिए ।

कम्पनीले कानुनको कार्यान्वयनमा केही समय थप गर्न माग गरेको छ । यदि प्रतिबन्ध एक महिनासम्म जारी रह्यो भने १७ करोड अमेरिकी प्रयोगकर्तामध्ये झन्डै एक-तिहाइले प्लेटफर्ममा पहुँच पाउन छोड्ने अनुमान छ । हालका लागि टिकटकको भविष्य अमेरिकामा सर्वोच्च अदालतको निर्णयमा निर्भर छ ।