लेबनानमा इजरायलले गरेको आक्रमणमा परि ४९२ जनाको मृत्यु

बेरुत (लेबनान), असोज ८ । सोमबार भएको इजरायली आक्रमणमा लेबनानमा कम्तीमा चार सय ९२ जनाको मृत्यु भएको छ । लेबनानको स्वास्थ्य मन्त्रालयले इजरायली आक्रमणमा ३५ बालबालिका र ५८ महिलासहित चार सय ९२ जनाको मृत्यु भएको र एक हजार ६४५ जना घाइते भएको जानकारी दिएको छ ।

स्वास्थ्यमन्त्री फिरास अबियादले ‘हजारौँ परिवार’ विस्थापित भएको बताएका छन् । पूर्वी लेबनानको प्राचीन सहर बाल्बेक नजिकै भएका विस्फोटहरुले आकाशमा धुवाँको मुस्लो उडाएको थियो । यो अक्टोबर ७ मा गाजामा युद्ध सुरु भएयता सीमापार हिंसाको सबैभन्दा घातक दिन भएको बताईएको छ

हमास र अन्य प्यालेस्टिनी लडाकूहरुले हिजबुल्लाह र इरान समर्थित अन्य समूहलाई समावेश गर्दै इजरायलमाथि अक्टोबर ७ मा आक्रमण गरेपछि युद्ध सुरु भएको हो । इजरायलले दक्षिणी पूर्वी लेबनानका करिब एक हजार ६ सय स्थानमा आक्रमण गर्दा ‘ठूलो संख्यामा’ हिजबुल्लाहका लडाकूहरु मारिएको बताएको छ । यसमा बेरुतमा ‘लक्षित आक्रमण’ पनि समावेश थियो । इजरायली सेनाले यसलाई ‘अपरेसन नर्दन एरो’ भनेको थियो ।

सरकारी सञ्चार माध्यमले पूर्वी लेबनानामा नयाँ आक्रमणहरुको खबर दिएपछि हिजबुल्लाहले मंगलबार बिहान इजरायली सैन्य ठेगानाहरुमा ‘मिसाइलहरुको वर्षा’ गरेको बताएका छन् । इजरायलको तटीय सहर हाइफामा सोमबार हवाई आक्रमणको साइरन बज्दा मानिसहरुलाई आश्रयस्थलतर्फ दौडिरहेको देखिएको थियो ।