काठमाडौं, साउन २७ । ह्वावेले ट्रिपल-फोल्डेबल स्मार्टफोन विकास गरिरहेको खबर गत जुलाईमा बाहिरिएको थियो । हालै यो स्मार्टफोन ह्वावेका एक उच्च अधिकारीको हातमा देखिएको छ । एन्ड्रोइड हेडलाइन्सको रिपोर्ट अनुसार ह्वावे कन्जुमर बिजनेस ग्रुपका सीईओ रिचर्ड यूको हातमा यो ट्राइ-फोल्ड स्मार्टफोन परेको छ ।
यो फोनमा ठूलो इनर स्क्रिन देखिन्छ, जुन तीन पटक फोल्ड गर्न सकिन्छ । वेइबोमा डिजिटल च्याट स्टेशन नामक टिप्स्टरले यसलाई पहिले कम्पनीको अनुसन्धान तथा विकास (आर एन्ड बी) का क्रममा देखिएको प्रोटोटाइप मिल्ने दावी गरेका छन् ।
यो स्मार्टफोनमा १० इन्चको इनर डिस्प्ले रहने छ, जसको फ्रन्ट क्यामेराका लागि होल-पन्च कटआउट राखिएको हुनेछ । यो स्मार्टफोन ट्राइ-फोल्ड हुँदा पनि मोटाइ धेरै नहुने अनुमान गरिएको छ ।
सम्भवतः यो स्मार्टफोनमा ह्वावेको नयाँ किरिन नाइन सिरिजको प्रोसेसर हुनेछ, जुन ह्वावेको पछिल्लो प्रोसेसर हो । हालसम्म फोनको बारेमा धेरै जानकारी बाहिर आएको छैन, तर यो ह्वावे मेट एक्स ६ को रूपमा बजारमा आउने चर्चा छ ।
