मुम्बई, साउन २३ । दक्षिण भारतीय सुपरस्टार अल्लू अर्जुनको नयाँ फिल्म ‘पुष्पा–२ः द रुल’ को प्रदर्शनको मितिका बारेमा धेरैले चासो व्यक्त गरिरहेका हुन्छन् । प्रारम्भमा यो फिल्म १५ अगस्तमा प्रदर्शन हुने कुरा थियो । यद्यपि, यसको प्रदर्शनलाई डिसेम्बरसम्मका लागि स्थगित गरिएको घोषणा गरियो ।
अहिले आएर फिल्मका निर्माताले यसको प्रदर्शन मिति घोषणा गरेका छन् । निर्माताले फिल्मको क्लाईमेक्स दृष्यको छायांकन गरिएसंगै ‘पुष्पा–२’ को प्रदर्शन मिति घोषणा गरेका हुन् । यो फिल्म अब डिसेम्बर ६, २०२४ का दिन प्रदर्शन हुने भएको छ । पुष्पा–२ प्रदर्शन मिति घोषणा भएसंगै फ्यानहरुसमेत उत्साहित भएका छन् ।
प्रदर्शन मिति घोषणा गर्न फिल्मका निर्माताले एउटा सानो भिडियो पनि शेयर गरेका छन् । उक्त भिडियोमा देखिएको एक्शन सीक्वेन्समा अल्लू अर्जुनको रोमाञ्चक अवतार देख्न सकिन्छ ।
सुकुमारद्वारा निर्देशित यो फिल्ममा अल्लू अर्जुनसंगै रश्मिका मन्दना तथा फहाद फासिल मुख्य भूमिकामा छन् ।
