काठमाडौँ, साउन ८ । पाकिस्तानका लोकप्रिय गायक राहत फतेह अलि खानले दुबईमा आफू गिरफ्तार भएको खबर झुटो भएको दावी गरेका छन् । राहतले सामाजिक सञ्जालमा एउटा भिडियो सेयर गर्दै आफू गिरफ्तार भएको झुटो खबर फैलाइएको भन्दै उक्त खबरमा विश्वास नगर्न आग्रह गरेका छन् ।
‘मेरो अनुरोध छ, यस्ता खबरमा विश्वास नगर्नु होला, म छिट्टै देश फर्किएर तपाईंहरुलाई सांगीतिक सरप्राइज दिने छु ।’ गीत रेकर्डिङको क्रममा दुबई पुगेको बेला उनी गिरफ्तार परेको खबर सार्वजनिक भएको थियो ।
यसअघि राहतका पुर्व प्रबन्धक सलमान अहमदको उजुरीमा दुबईमा प्रहरीले हिरासतमा लिएको बताइएको थियो । राहतको सलमानसँगको विवाद केहि वर्षदेखि नै चलिरहेको थियो ।
गायक राहत पटक–पटक विवादमा आइरहन्छन् । यस अघि उनले एक व्यक्तिलाई जुत्ताले हानेको भिडियो भाइरल भएको थियो भने उनलाई २०१९ मा विदेशी मुद्रा स्मलिङ गरेको आरोप लागेको थियो । पाकिस्तानी गायक राहत बलिवुडमा फिल्मका गीतका कारणसमेत चर्चित छन् ।
