काठमाडौं, जेठ २९ । केही दिनयता पश्चिम तराईका धनगढी र नेपालगञ्जको अधिकतम तापक्रम ४४ डिग्री सेल्सियसभन्दा माथि पुगेको छ ।
जसका कारण अत्याधिक गर्मी महसुस हुन थालेको छ । जल तथा मौसम विज्ञान विभागले ती भेगका बासिन्दालाई गर्मीबाट बच्न सतर्कता अपनाउन आग्रह गरेको छ ।
मौसम पूर्वानुमान महाशाखाले मंगलबार बिहान पौने ९ बजे सार्वजनिक गरेको १६ स्थानको विवरणमध्ये धनगढीको अधिकतम तापक्रम सबैभन्दा बढी ४४ डिग्री सेल्सियस मापन गरिएको छ ।
यस्तै, नेपालगञ्जमा ४३.६, बिराटनगरमा ४०.९, दिपायलमा ४०.७, भैरहवामा ३९.८ र काठमाडौंमा ३४.४ डिग्री सेल्सियस तापक्रम पुगेको छ । आज ओखलढुंगाको सबैभन्दा कम तापक्रम २६.२ डिग्री सेल्सियस मापन गरिएको छ । पछिल्लो समय काठमाडौं उपत्यकामा समेत अत्याधिक गर्मी हुन थालेको छ ।
