नयाँ दिल्ली, जेठ २२ । अभिनेत्री कंगना रनौत अहिले आएर राजनीतिको समेत क्वीन बनेकी छिन् । लोकसभा २०२४ निर्वाचनमा भारतीय जनता पार्टीको उम्मेदवार कंगना रनौतले मंडी लोकसभा सीटबाट निर्वाचनमा विजयी भएकी छिन् । कंगनाले कांग्रेसका पूर्व मुख्यभन्त्री वीरभद्र सिंह तथा वर्तमान सांसदका छोरा विक्रमादित्य सिंहलाई पराजित गर्दै जीत हासिल गरेकी हुन् ।
जीतपछि उनले ट्वीटरबाट सबैलाई धन्यवाद दिँदै भनेकी छिन्– ‘सम्पूणी मंडीवासिहरुलाई यो जनाधार, यो माया र विश्वासका लागि मनैदेखि आभार । यो जीत तपाईंहरुको सबैको हो, यो जीत प्रधानमन्त्री मोदीको हो र भाजपाको विश्वासको हो, यो जीत सनातनको हो, यो जीत मंडीको सम्मानको हो ।’
लोकसभा निर्वाचनमा शानदार जीत हासिल गरेपछि कंगना रनौतले निकै खुशी छिन् । उनका लागि यो जीतले निकै महत्व राख्छ । एउटा सानो शहरबाट बाहिर आएर कंगनाले जुन सफलता हासिल गरेकी छिन्, त्यो वास्तवमै प्रशंसा योग्य छ । कंगना भारतका हरेक युवतीका लागि उदाहरण बनिसकेकी छिन् । कंगनाले के कुरा प्रमाणित गरेकी छिन् भने यदि सत्यता तथा लगनशिल भएर मेहनत गरियो भने सपना सत्यतामा परिणत हुन्छ नै ।
जीतपछि कंगनाका प्रशंसक तथा बलिउडकर्मीहरुले वधाइ दिइरहेका छन् । कंगनाका प्रशंसाले पनि उनको जीतमा खुशीयाली मनाइरहेका छन् । सामाजिक सञ्जालमा कंगनाको जीतको खुशीमा पोस्ट शेयर गर्दै खुशी बाँड्ने कार्य जारी छ ।
कंगना रनौतको अभिनय यात्रा पनि निकै रोचक छ । उनले मोडलिङबाट यात्रा थालनी गर्दै सन् २००६ मा ग्याङस्टर फिल्मबाट बलिउडमा कदम राखेकी थिइन् । आफ्नो १८ वर्षको फिल्मी करियरमा कंगनाले दजर्नौं फिल्ममा काम गरिसकेकी छिन्, जसमा फेसन, क्वीन, कृष ३, तनु वेड्स मनु जस्ता सफल फिल्ममा अभिनय गरिसकेकी छिन् ।
कंगनाले चार पटक भारतको नेशनल अवार्डसमेत जितिसकेकी छिन् । फिल्ममा आफ्नो शानदार योगदानका लागि कंगना भारतको पद्यश्री अवार्डबाट समेत सम्मानित भैसकेकी छिन् । यसबाहेक उनलाई पाँच पटक फिल्मफेयर अवार्ड जितेकी छिन् ।
