महरा पक्राउपछि गगनको टिप्पणी : आयोग बनाउने एमालेकाे माग सहि रहेछ

काठमाडौं, चैत ५ । प्रमुख प्रतिपक्षी नेपाली कांग्रेसले सुन काण्डमा नेकपा माओवादी केन्द्रका उपाध्यक्ष कृष्णबहादुर महरा पक्राउ परेपछि सरकारलाई धन्यवाद दिएको छ । आज (सोमबार) प्रतिनिधिसभा बैठकमा बोल्दै नेपाली कांग्रेसका महामन्त्री गगनकुमार थापाले सुन काण्डमा मुछिएकाहरू कसैलाई पनि छाड्न नहुने बताएका हुन् ।

महामन्त्री थापाले तत्कालीन प्रमुख प्रतिपक्षी नेकपा एमालेले सुन प्रकरणमा कुरा नउठाएको भए सुन काण्ड फासफुस हुने देखिएको टिप्पणी गरेका छन् । उनले भने, ‘सुन काण्डमा माओवादी केन्द्रका उपाध्यक्ष कृष्णबहादुर महरा पक्राउ परेका छन् । आयोगले किटान गरेका कोही व्यक्तिलाई छोड्नु हुँदैन । यसमा सरकारलाई पूर्ण साथ रहन्छ । यसले हामीलाई एउटा कुरा सिकाएको छ । तत्कालीन प्रमुख प्रतिपक्षी नेकपा एमालेले यो विषयमा कुरा नउठाएको भए आयोग नबन्ने रहेछ । आयोग नबनेको भए सुन काण्ड फासफुस हुने रहेछ ।’

उनले प्रधानमन्त्री पुष्पकमल दाहाल ‘प्रचण्ड’ नेतृत्वको सरकारले सुन प्रकरणमा शक्तिशाली नेताहरूलाई लुकाउन प्रपञ्च गरिएको पुष्टि भएको बताए । सुनको अवैध पैठारी (तस्करी) नियन्त्रणसम्बन्धी जाँचबुझ आयोगले आयोगले पूर्वसभामुख समेत रहेका माओवादी केन्द्रका उपाध्यक्ष महरासहित १२ जनालाई कारबाही सिफारिस गरिएको हो ।

आयोगले बुझाएको प्रतिवेदन उपप्रधान तथा गृहमन्त्री रवि लामिछानेले शुक्रबार प्रधानमन्त्री पुष्पकमल दाहाललाई बुझाएका थिए । त्यसपश्चात मन्त्रिपरिषद्को बैठकले आयोगको प्रतिवेदन कार्यान्वयन गर्ने निर्णय गरेको हो । सोही अनुसार गृहमन्त्री लामिछानेले मातहतका सुरक्षा निकायलाई पक्राउ गर्न निर्देशन दिएका थिए । सोही निर्देशनअनुसार महरालाई आज प्रहरीले नियन्त्रणमा लिएको हो ।