काठमाडौं, फागुन ३० । भारतीय सेयर बजारमा सोमबार भारी गिरावट आउँदा लगानीकर्ताको खरबौं रुपैयाँ सम्पति गुमेको छ ।
भारतका प्रमुख सेयर बजार सूचकहरु ‘बीएसई सेन्सेक्स’ र ‘निफ्टी ५०’ दुवैमा बुधबार गिरावट आएको हो । सेन्सेक्स ९०६ विन्दुले घटेर ७२,७६१ विन्दुमा आएको छ । यस्तै, निफ्टी सूचक पनि ३३८ विन्दुले घटेर २१,९९७ विन्दुमा आएको छ ।
भारतीय सेयर बजारमा बुधबार विशेषगरी सानो (स्मल क्याप) र मध्यम (मिड क्याप) पुँजीकरण भएका र एसएमई कम्पनीहरुमा भारी गिरावट आएपछि समग्र सूचक घटेको हो । ‘स्मल क्याप इन्डेक्स’ ५%, ‘मिड क्याप इन्डेक्स’ ४% र ‘एसएमई इन्डेक्स’ ६% ले घटेका छन् ।
भारतीय बजार नियामकले केही समय अघि भारतका स्मल क्याप र मिड क्याप कम्पनीहरुको मूल्यांकन उच्च भएको (ओभरभ्याल्यूएसन) भन्दै सचेत गराएको थियो । सेबीको टिप्पणीको असर पनि यी सूचकहरुमा परेको विश्लेषण गरिएको छ ।
बजारमा भारी गिरावट आउँदा बुधबार भारतीय लगानीकर्ताले एकै दिन १४० खर्ब भारु बराबरको सम्पति गुमाएका छन् । बीएसई सेन्सेक्समा सूचीकृत सबै कम्पनको बजार पुँजीकरण १४० खर्ब (१४ लाख करोड) भारुले घटेर ३७२ लाख करोडमा आएको इकोनोमिक टाइम्सले उल्लेख गरेको छ ।
