इस्लामावाद, माघ १५ । पाकिस्तानी गायक राहत फतेह अली खानबारे सनसनीपूर्ण समाचार बाहिर छ । ट्विटरमा तीव्र रुपमा भाइरल भइरहेको एउटा भिडियोमा गायकले आफ्नो एक नोकरलाई चप्पल हानिरहेका देखिन्छन् ।
टेबलमा राखेको रक्सीको बोतल कहाँ गयो भनेर गायकले सोधिरहेको सुनिन्छ । यो भिडियो देखेपछि पाकिस्तानी सर्वसाधारणले गायकको व्यापक आलोचना गरिरहेका छन् ।
भिडियोमा गायकले नोकरको कपाल समातेका छन् । हातमा चप्पल समातेर टाउकोमा धमाधम हान्छन् । नोकर भागेर पर पुगे पनि उनले छाड्दैनन । रक्सीको बोतल कहाँ गयो भन्ने जवाफ नआएपछि उनले पुनः नोकरको कपाल भुत्लाएर पिट्न थाल्छन् । पिटाइ सहन नसकेर उनी ढल्छन् । त्यहि उभिएका अन्य व्यक्तिले उसलाई समातेर उठाइदिन्छन् । तर गायकले पिट्न छाड्दैनन् ।
सामाजिक सञ्जालमा यो भिडियो व्यापक शेयर हुन थालेपछि गायकले पिटाइ खाएकै नोकरसँग एउटा भिडियो शेयर गरेका छन् । त्यो भिडियोमा गायकले नोकरसँग माफी माग्दै उस्ताद र शिष्यको आपसी मामिला भएको बताएका छन् । पिटाई खाएका व्यक्ति (नोकर) ले पनि आफ्नो उस्तादलाई बदनाम गर्ने कोशिश गरिएको बताएका छन् ।
अघिल्लो भिडियो हेरेर भड्किएका मानिसहरु दोस्रो भिडियो देखेर झनै चिढिएका छन् । केहिले त झुठो बोलेर आफूहरुलाई पागल बनाउने कोशिश गरेको आरोप समेत गायक खानलाई लगाएका छन् ।
