काठमाण्डौ, माघ ८ । प्रधानमन्त्री पुष्पकमल दाहाल (प्रचण्ड) र तिल गंगा आखा केन्द्रका कार्यकारी निर्देशक एवं वरिष्ठ नेत्र चिकित्सक डा. सन्दुक रुइत बीच भेटवार्ता भएको छ ।
शनिबार डा. रुइतले प्रधानमन्त्री प्रचण्डसँगको भेटमा तिलगङ्गा आँखा केन्द्रलाई मानित विश्वविद्यालयको रूपमा विकास गर्ने चासो राखेपछि प्रधानमन्त्रीले उक्त प्रतिवद्धता व्यक्त गरेका हुन् । “मानित विश्वविद्यालय बनाउने विषय अत्यन्तै सकारात्मक छ र यससम्बन्धी आवश्यक नीतिगत सुधारका लागि आवश्यक पहल हुन्छ ।” – उनले भने
भेटका अवसरमा प्रधानमन्त्री प्रचण्डले मानवीय सेवाका लागि डा. रुइतले हालैमात्र बहराइन सरकारद्वारा प्रदान हुँदै आएको ‘इसा अवार्ड’ प्राप्त गरेकोमा बधाइ दिँदै यो अवार्डले देशकै सम्मान बढाएको बताए । नेपालमा अन्तर्राष्ट्रियस्तरका दक्ष जनशक्ति छन भन्ने सन्देश दिएको छ र मानवीय सेवाका लागि तपाईको योगदानको कदर देशकै कदर हो भन्दै प्रधानमन्त्री प्रचण्डले आँखा उपचारका लागि सरकारका तर्फबाट आवश्यक अन्य सबै सहयोग गर्नेसमेत प्रतिबद्धता व्यक्त गरेका हुन् । डा.रुइतले आँखा उपचारको क्षेत्रमा नेपालले नमुना काम गरेको बताउँदै मोतिबिन्दु उपचारका लागि नेपालमै औषधि उत्पादन गर्न सकिने सम्भावना रहेको बताए ।
