काठमाडौं, कार्तिक १ । भारतले प्रतिबन्धका बीच केही देशहरुमा चामल निर्यात खुला गरेको छ ।
नेपालसहित ७ देशमा विभिन्न परिमाणमा गैर–बासमती सेतो चालम निर्यात गर्न भारत सरकारले अनुमति दिएको हो । यी देशहरुमा नेपाल, क्यामरुन, आइभरी कोस्ट, रिपब्लिक अफ गिनी, मलेसिया, फिलिपिन्स र सेशेल्ज रहेको भारतीय सञ्चार माध्यमहरुले उल्लेख गरेका छन् ।
यी देशहरुमा नेसनल कोअपरेटिभ एक्सपोर्ट्स लिमिटेडमार्फत चामल निर्यात गर्न अनुमति दिइएको भारतको वैदेशिक व्यापार निर्देशनालयले बुधबार जारी गरेको सूचनामा उल्लेख छ । यसअघि भारतले संयुक्त अरब इमिरेट्स (युएई) र सिंगापुरमा पनि गैर–बासमती सेतो चामल निर्यात गर्न अनुमति दिएको थियो ।
वैदेशिक व्यापार निर्देशनालयले यी देशहरुको खाद्य सुरक्षा आवश्यकता पूरा गर्न र त्यहाँका सरकारहरुको अनुरोधका आधारमा निर्यात खुला गरिएको बताएको छ ।
भारतले सरकार–सरकार (जी टु जी) बीचको सहमतिका आधारमा यी ७ देशहरुमा कुल १०.३४ लाख टन गैर–बासमती सेतो चामल निर्यात गर्न अनुमति दिएको छ ।जसमध्ये सबैभन्दा धेरै फिलिपिन्सलाई २.९५ लाख टन छुट्याइएको छ । यस्तै, क्यामरुनलाई १.९ लाख टन, मलेसियालाई १.७ लाख टन र आइभरी कोस्टलाई १.४२ लाख टन निर्यात हुनेछ ।
यता, रिपब्लिक अफ गिनीमा १.४२ लाख टन, नेपालमा ९५ हजार टन र सेशेल्जमा ८ सय टन निर्यात हुनेछ ।
Published Date: 18 October 2023
