चीन, असोज १९ । एशियन गेम्सको क्रिकेट प्रतियोगिताको शुक्रवार बिहान सम्पन्न सेमिफाइनल खेलमा भारतले बंगलादेशलाई पराजित गरेको छ । यो जीतसंगै भारत यो प्रतियोगिताको फाइनलमा पुगेको छ ।
आज भएको सेमीफाइनल खेलमा भारतले बंगलादेशलाई ९ विकेटले पराजित गरेको हो । यो प्रतियोगिताको फाइनल खेल भोलि शनिवार सम्पन्न हुँदैछ । यसअघि भारतीय टीमले क्वाटरफाइनल खेलमा नेपाललाई २३ रनले पराजित गरेको थियो ।
आजको खेलमा भारतले टस जितेर पहिला फिल्डिङ गर्ने निर्णय गरेको थियो । बंगलादेशको टीमले निर्धारित २० ओभरमा ९७ रनमात्र जोड्न सफल भयो ।
भा।तका साई किशोरले चार ओभरमा १२ रन दिएर तीन विकेट लिए भने वाशिङ्टन सुन्दरले चार ओभरमा १५ रन दिएर दुई विकेट लिए ।
९७ रनको लक्ष्य पछ्याउन मैदानमा उत्रिएको भारतले पहिलो विकेट सस्तैमा गुमायो । नेपाल विरुद्धको खेलमा शतक प्रहार गर्ने यशस्वी जायसवाल शून्य रनमा आउट भए । त्यसपछि भारतीय कप्तान ऋतुराज गायकवाड तथा तिलक वर्माले उत्कृष्ट ब्याटिङ गर्दै भारतलाई जीत दिलाए ।
त्यसक्रममा गायकवाडले २६ बलमा ४० रन बनाए भने तिलक वर्माले पनि २६ बलमै ५५ रन बनाए । उनले दुई चौका तथा छ छक्का प्रहार गरे ।
आजै हुने पाकिस्तान तथा अफगानिस्तानबीचको सेमीफाइनलको विजेतासंग भारतले भोलि फाइनल खेल्ने छ ।
