काठमाडौँ, असोज १५ । दक्षिण एसियाली मुलुकमध्ये नेपालमा पेट्रोलियम पदार्थको मूल्य सबैभन्दा महँगो रहेको छ । नेपाल आयल निगमले शनिबार रातिदेखि लागू हुनेगरी नयाँ मूल्य सूची सार्वजनिक गरेको थियो । जसमा ग्यासको भाउ प्रतिसिलिन्डर २१५ रुपैयाँ वृद्धि गरिएको थियो ।
चार्डपर्वको मुखमा मूल्य वृद्धि भएको भन्दै चौतर्फी विरोध भएपछि आइतबार बसेको मन्त्रीपरिषद् बैठकमा प्रधानमन्त्री पुष्पकमल दाहाल प्रचण्डले बढेको मूल्य लागू नगर्न निर्देशन दिएका छन् । अहिले बढेको मूल्य स्थगित भए पनि पुरानै भाउलाई आधार मान्दासमेत नेपालमा इन्धनको मूल्य दक्षिण एसियाली मुलुकहरुको तुलनामा सबैभन्दा महँगो रहेको छ ।
नेपालमा १५ दिनअघि कायम पेट्रोलको अधिकतम मूल्य प्रतिलिटर १८३ रुपैयाँ रहेको छ।निगमले शनिबारदेखि लागू हुनेगरी १८५ रुपैयाँसम्म बढाएको थियो । त्यसैगरी डिजेलको १७३ रुपैयाँ रहेको छ । यसमा पनि शुल्क बढाएर १७९ रुपैयाँ प्रतिलिटर तोकेको थियो ।
सबैभन्दा धेरै एलपी ग्यासमा १८ सय ९५ रुपैयाँबाट बढाएर २१ सय १० रुपैयाँ पुर्याइएको थियो । तर, मन्त्रीपरिषद्ले मूल्य नबढाउन निर्देश दिएपछि अब यिनीहरुको दर १५ दिनअघि कै कायम हुनेछ ।
यता, दक्षिण एसियामा सबैभन्दा सस्तो इन्धन भने भुटानमा पाइन्छ । ग्लोबल पेट्रो प्राइसका अनुसार यहाँ प्रतिलिटर पेट्रोलको मूल्य नेपाली मुद्रामा हिसाब गर्दा ११८ रुपैयाँ ६० पैसा रहेको छ भने डिजेलको १२८ रुपैयाँ ३० पैसा पर्छ । त्यस्तै, माल्दिभ्समा प्रतिलिटर पेट्रोल मूल्य नेपालीमा हिसाब गर्दा १२७ रुपैयाँ ७८ पैसा र डिजेलको १३० रुपैयाँ ७३ पैसा पर्न आउँछ ।
भारतको नयाँ दिल्लीमा प्रतिलिटर पेट्रोलको (नेरु) भाउ १५४ रुपैयाँ ७५ पैसा रहेको छ भने डिजेल १४३ रुपैयाँ ३९ पैसा रहेको छ । भारतमा विभिन्न राज्य अनुसार इन्धनको मूल्य निर्धारण हुन्छ ।
यता, आर्थिक अवस्था खस्किँदै गएको पाकिस्तानमा पनि इन्धनको रेट नेपालको भन्दा सस्तो छ । त्यहाँ प्रतिलिटर पेट्रोल नेपाली मुद्रा १५१ रुपैयाँ ७२ पैसा र डिजेल १५० रुपैयाँ ७२ पैसा रहेको छ । श्रीलंकामा भने पेट्रोल प्रतिलिटर १७१ रुपैयाँ ३० पैसा र डिजेल १४० रुपैयाँ ८ पैसा पर्छ ।
Published Date: 02 October 2023
