काठमाडौं, असोज १४ । सुन तस्करीबारे छानबिन गर्न बनाइने उच्चस्तरीय जाँचबुझ आयोगको कार्यादेशमा दलहरुबीच सहमति जुटेको छ ।
प्रधानमन्त्री निवास बालुवाटारमा बसेको ६ दलका शीर्ष नेताहरूको बैठकमा उच्चस्तरीय जाँचबुझ आयोगलाई भेप, ब्रेक सुमा लगाएर ल्याइएको सुनलगायत पटक पटक भएको सुन तस्करीबारे भएको छानबिनको अध्ययन गर्ने र तस्करीको प्रकृति, सुनको परिमाण, अपराधको दायरा र यसमा संलग्न व्यक्तिका सन्दर्भमा थप छानबिन कार्यादेश दिने सहमति जुटेको हो ।
बैठकमा सुन तस्करी प्रकरणमा उच्चस्तरीय जाँचबुझ आयोग आजै गठन हुने र त्यो प्रतिनिधि सभाको बैठक बस्नु पूर्व नै घोषणा गर्ने सहमति भएको सचेतक बर्तौलाले जानकारी दिए ।
आयोगले आजैबाट कार्य प्रारम्भ गर्ने सहमति समेत भएको सचेतक बर्तौलाले जानकारी दिए ।
यसैबीच, अहिले मन्त्रीपरिषद्को आकस्मिक बैठक बसिरहेको छ ।
यसअघि, आज बिहान बसेको प्रधानमन्त्री निवास बालुवाटारमा बसेको सत्तापक्ष र नेकपा एमालेबीचको बैठक सकारात्मक भएको बताइएको छ ।
बैठकमा सुन तस्करी प्रकरणमा उच्चस्तरीय जाँचबुझ आयोग आजै गठन गर्ने विषयमा सकारात्मक छलफल भएको र आज नै आयोग निर्माण हुने गरी कार्यादेश तयार गर्ने सहमतिको नजिक पुगेको नेकपा एमालेका सचेतक महेश बर्तौलाले जानकारी दिनुभयो ।
आजको संसद् बैठकमा प्रधानमन्त्रीले सम्बोधन गर्ने र सदन चल्नुअघि नै उच्चस्तरीय जाँचबुझ आयोग घोषणाको तयारी भइरहेको पनि सचेतक बर्तौलाले जानकारी दिनुभयो ।
बालुवाटारमा प्रधानमन्त्री प्रचण्ड, काँग्रेसबाट उपसभापति एवं उपप्रधान तथा गृहमन्त्री पूर्णबहादुर खड्का, एमालेबाट अध्यक्ष ओली, उपाध्यक्ष विष्णु पौडेल र सचेतक महेश बर्तौलाबीच, उपप्रधान तथा गृहमन्त्री नारायणकाजी श्रेष्ठ, र मुख्य सचेतक हितराज पाण्डे सहभागी हुनुहुन्थ्यो ।
