काठमाडौं, असोज ८ । नेपाल साफ यू–१९ च्याम्पियनसिप फुटबलको सेमिफाइनलमा पुगेको छ । समूहगत चरणको दोस्रो तथा अन्तिम खेलमा सोमबार मालदिभ्सलाई ४–१ गोल अन्तरले पराजित गर्दै नेपालले सेमीफाइनलको यात्रा तय गरेको हो ।
आजको रोमाञ्चक खेलमा २–० गोलले पछाडि परेको अवस्थामा ५८ औँ मिनेटमा मालदिभ्सले गोल गर्दै पुनरागमनको प्रयास गरेको थियो ।
त्यसअघि नेपालले १८ औँ मिनेटमा प्रशान्त लक्समको गोलमा अग्रता लिएको थियो भने समिर तामाङले ३० औँ मिनेटमा घरेलु टोलीको अग्रता दोब्बर बनाए ।
३५ औँ मिनेटमा नेपालका सुजन डंगोल तथा मालदिभ्सका कप्तान मोहम्मद इयान हसनले रातो कार्ड पाएका थिए । १०–१० जना खेलाडीमा सिमित भएको खेलको ८६ औँ मिनेटमा नेपालले तेस्रो गोल गरेको थियो । निराजन धामीले उक्त गोल गरेका थिए । इन्जुरी समयमा नेपालले अर्को गोल थपेको थियो ।
त्यसअघि पहिलो खेलमा पाकिस्तानसँग १–० गोलले पराजित भएपछि नेपाली टोली दवावमा आएको थियो । आजको जीतसंगै नेपालले फाइनल पुग्न भारत अथवा भुटानमध्ये एउटा टीमसंग खेल्ने छ ।
सोमबार साँझ भारत र भुटानबीच हुने खेलबाट सेमीफाइनलमा नेपालको प्रतिद्वन्दि निश्चि हुनेछ ।
Published Date: 25 September 2023
