काठमाडौं, भदौ १६ । प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले जनताका घर-दैलोमा पुगेर उनीहरूका कुरा/समस्या सुन्न नेता/कार्यकर्तालाई निर्देशन दिएका छन् ।
शनिबार पार्टीको तीन महिने रुपान्तरण अभियानको उद्घाटन गर्दै उनले सरकारले गरेका राम्रा कामको प्रचार गर्नसमेत नेता कार्यकर्तालाई निर्देशन दिए ।
‘बिर्सनै नहुने कुरा के हो भने जनता परिवर्तनकै पक्षमा छन् । जनता समृद्धि चाहन्छन्। जनता सुशासन चाहन्छन् । अनि योसँगै हामीले जनतालाई विश्वास दिलाउनुपर्दछ– नेपाली समाजको परिवर्तन र रूपान्तरण माओवादीले नै गर्नसक्छ । माओवादीकै नेतृत्वमा मात्र समृद्ध नेपाल सम्भव छ’, निर्देशन दिँदे उनले भनेका छन् – ‘तसर्थ कमरेडहरू जनतासँग हामीले भन्न सक्नुपर्छ– हाम्रा गल्ती कमजोरीका लागि आत्मालोचित हुन चाहन्छौँ। सुध्रिन चाहन्छौँ। त्यसका लागि अभियानसहित तपाईंहरूको घरदैलोमा छौँ ।’
जनताका आसा, अपेक्षा र सुझावसमेत ग्रहण गर्न उनले निर्देशन दिए ।
दाहालको भनाइ छ – ‘अभियानले जन सम्बन्ध कमजोर हुँदै जाने परिस्थितिलाई चिर्ने छ । आजको युगको नेतृत्व गर्ने विचार निर्माणको आधार तयार पार्ने छ,’ उनले भने, ‘सरकारले सामाजिक न्यायको प्रत्याभूति, शुसासन र विकासलाई मुख्य प्राथमिकता दिएको छ । सरकारले इतिहासले नै सम्झिने गरी एकपछि अर्को काम गरिरहेको छ । सरकारले गरेका राम्रा काम जनतासम्म पुगेका छैनन् । यसले सरकार र जनताको सम्बन्ध बढाउने छ ।’
