काठमाडौं, साउन २८ । काठमाडौं महानगरपालिकाले वर्षायामभर पानीपुरी, चाटपाटेलगायतका खाद्यवस्तु बिक्री वितरणमा रोक लगाउने तयारी गरेको छ ।
आइतबार बसेको अनुगमन समितिको बैठकमा यस विषयमा छलफल भएको महानगरका प्रमुख प्रशासकीय अधिकृत वसन्त अधिकारीले जानकारी दिए । पानीपुरी, चाटपाटे जस्ता खानेकुराबाट हैजाजस्ता रोग तीव्र गतिमा सर्ने भएकाले कामपाले निश्चित अवधिका लागि बिक्री वितरणमा रोक लगाउने तयारी गरिरहेको उनले बताए ।
‘प्लास्टिकको कन्टेनरमा दूध बिक्री गर्ने र रबर ब्याण्डले सुरक्षित गर्ने चलन नियमविपरीत भएकोले तत्काल बन्द गरिनुपर्छ’, अधिकारीले भने ।
उपमेयर सुनिता डंगोलले वर्षायाममा पानीजन्य रोग फैलिन नदिन अनुगमनलाई थप कडाइ गरिने बताइन् । महानगरले तत्कालै बजारको गतिविधि अनुगमन गर्न टोली खटाउने उनले बताइन् । चेतावनी दिएर पनि सुधार नगर्नेलाई कानुनी र प्रशासनिक कारबाही भोग्नुपर्ने उनले बताइन् ।
त्यसैगरी कामनपाले चुरे, फुटेका र भाँचिएका पानीका भाँडोमा पानी बिक्री नगर्ने मापदण्ड विपरीत पानीका जार जफत गरी नष्ट गर्ने अभियानलाई निरन्तरता दिने भएको छ ।
Published Date: 13 August 2023
