काठमाडौं, साउन २४ । अहिले देशैभरी डेंगूका विरामीको संख्या बढिरहेको छ । स्वास्थ्य तथा जनसंख्या मन्त्रालयले डेंगू फैलिनबाट रोक्नका लागि विभिन्न उपाय अपनाउन आग्रहसमेत गरिरहेको छ ।
अहिले नेपालमा आठ हजारभन्दा बढी डेंगू संक्रमित रहेका छन् भने ज्यान गुमाउनेको संख्या पनि बढ्दै गइरहेको छ । त्यसैले लामखुट्टेको टोकाइबाट हुने यो रोग निवारण सम्बन्धि कुरामा ध्यान दिन अति नै आवश्यक छ ।
विशेष गरेर गर्भवती महिलाले डेगू संक्रमणबाट बच्नु आवश्यक छ । गर्भवती महिलामा डेंगू संक्रमण हुँदा यसले गर्भमा रहेको शिशुलाई समेत खतरा हुन्छ ।
गर्भवती महिलालाई डेंगू संक्रमण भयो भने समयभन्दा अगाडि बच्चा जन्मने र भ्रूणको मृत्यु पनि हुन सक्ने खतरा रहन्छ ।
वर्षायाममा उत्पन्न हुने डेंगूमा ज्वरो आउने, हड्डि अत्यधिक दुख्ने, वाक– वाक लाग्ने, वान्ता हुने आदि जस्ता लक्षण देखिन्छ । गर्भवतीले लामखुट्टेको टोकाईबाट बच्न अति आवश्यक छ । जसका लागि पुरा बाहुला भएको लुगा लगाउनु पर्छ भने झुल हालेर सुत्नु पर्छ ।
गर्भवती महिलामा डेंगूको खतरा अत्यधिक किन हुन्छ ?
गर्भवती अवस्थामा गर्भमा रहेको भ्रूणलाई सपोर्ट गर्नका लागि प्रतिरोधक क्षमता परिवर्तन हुन्छ, जसले गर्भवती महिला डेंगू जस्तो संक्रमणप्रति अत्यधिक संवेदनशील हुन्छन् । यसबाहेक गर्भावस्थाको क्रममा हार्मोनल परिवर्तनले पनि संक्रमित हुने विरामीको गम्भीरतालाई प्रभावित गर्छ ।
त्यस्तै गर्भावस्थाको क्रममा डेंगू संक्रमणबाट आमा र बच्चा दुवैका लागि समस्या उत्पन्न गर्छ । जसले समय अगाडि जन्म, जन्मिएको समयमा कम वजन र भ्रूणको मृत्युसमेत हुन सक्छ ।
डेंगूका लक्षण
१. उच्च ज्वरो
२. गम्भीर रुपमा टाउको दुख्नु
३. जोर्नी र मांसपेशिको दुखाई
४. शरीर चिलाएर दाना निस्कनु आदि ।
यस्ता लक्षण देखिएमा तुरुन्त डाक्टरलाई जँचाउनु पर्छ ।
Published Date: 09 August 2023
