काठमाडौं, असार १२ । सत्तारुढ दल नेपाली कांग्रेसले अनलाइनबाट सर्वसाधारण सदस्यता लिन सक्ने अभिनव प्रणाली ल्याएको छ ।
पार्टीका महासचिव गगन थापाको अध्यक्षतामा रहेको सदस्यता व्यवस्थापन समितिको मंगलबार पार्टी केन्द्रीय कार्यालय सानेपामा बसेको बैठकले अनलाइन सदस्यता प्रक्रिया सुरु गरेको हो ।
पार्टीका कार्यवाहक मुख्य सचिव प्रदीप पराजुलीले इच्छुक व्यक्तिले अब अनलाइन प्लेटफर्मबाट २० रुपैयाँ शुल्क तिरेर नेपाली कांग्रेसको साधारण सदस्यता लिन सक्ने बताए । इच्छुक सदस्यहरूले पार्टीको वेवसाइटमा गएर सदस्यता आवेदन भर्न र अनलाइनबाटै भुक्तानी गर्न सक्ने पनि उनले बताए ।
सदस्यता फारम बुझाएपछि, आवेदकहरूले उनीहरूको मोबाइल फोनमा पुष्टिकरण सन्देश प्राप्त गर्नेछन् । पराजुलीले भने – ‘आवश्यक प्रक्रिया पूरा भएपछि पार्टीको केन्द्रीय कार्यालयले आवेदन प्रशोधन गर्नेछ र आवेदकले अनलाइन प्लेटफर्मबाट फोटोसहितको सदस्यता कार्ड प्राप्त गर्नेछन् । ’
त्यसैगरी सक्रिय सदस्यता नवीकरणका लागि सम्बन्धित जिल्ला कार्यालयलाई जिम्मा दिइएको छ । कांग्रेसले सक्रिय सदस्यताको व्यवस्था पनि गरेको छ । निकट भविष्यमा, पार्टीले आफ्नो आधिकारिक वेबसाइट मार्फत सक्रिय सदस्यताको लागि अनलाइन नवीकरण आवेदन सक्षम गर्ने योजना बनाएको पराजुलीले थपे।
काङ्ग्रेसले लागू गरेको यो नयाँ अनलाइन सदस्यता प्रणालीले सदस्यता प्रक्रियालाई सहज र सरल बनाउने उद्देश्यले पार्टीमा प्रवेश गर्न चाहने व्यक्तिहरूलाई थप सुलभ र सहज बनाउने लक्ष्य राखेको पार्टीका पदाधिकारीहरू बताउँछन्।
Published Date: 27 June 2023
